Wa'y Sukod Sa Bawos

Cebu, Philippines- Nakabawos ang Golden State Warriors ug dili basta-basta ang ilang kadaogan kay gilubong nila ang Los Angeles Lakers, 124-103 pagtak-op sa ilang  NBA pre-season games kagahapon didto sa Chase Center sa San Francisco, California.

Si Curry mipabuto og 32 puntos, samtang ang bag-o niyang All-Star teammate nga si D'Angelo Russell mipugnit og 29 puntos alang sa Warriors nga misakmit sa labing una nilang daog sa upat nila ka pre-season  games batok sa Lakers.

Gipahimuslan sa Warriors ang wala pagduwa sa mga alas sa Lakers nga sila si Anthony Davis ug  LeBron James nga gipapahuway ni coach Frank Vogel. 

Balanse nga ataki ang gihimo sa Warriors diin si Glenn Robinson mitampo og 13 puntos, si Draymond Green miiskor lang og nuybe puntos, apan nagbangis sa rebounding  diin milangkat siya og 12 ka rebounds nga nakatabang pagpadaog sa Warriors.

Nangulo sa Lakers ang reserve player nga si Zach Norvell Jr. nga miiskor og 29, samtang ang beteran nga si Kentavious Caldwell-Pope mirehistro og 25 puntos.

Gawas sa superstar tandem nila ni James ug Davis, wala usab miduwa sila si Danny Green, Rajon Rondo, Javale McGee, Dwight Howard ug Kyle Kuzma sa Lakers.

Samtang sa ilang bahin, ang Houston Rockets mitapos sa ilang pre-season campaign pinaagi sa pagdaog  batok sa Miami Heat, 144-133.

Grabe kaayong nakapamuntos si James Harden bisan og pre-season lang, miburak kini og 44 puntos.

Sa ubang mga duwa, ang New Orleans Pelicans nakaipsot sa New York Knicks, 117-116 bisan wala moduwa ilang star rookie nga si Zion Williamson tungod sa injury, samtang ang San Antonio Spurs midaog batok Memphis Grizzlies, 104-91.