Portmen, rollway daog dayon sa ABCC Season 2

CEBU, Philippines – Daog maoy misugat sa Portmen ug Rollway/Abay-Abay Customs Brokerage pagsugod sa Aduana Basketball Club Cebu (ABCC) Season 2 Inter-Brokerage Cup 2019 niadtong Martes sa gabii diha sa Cebu Port Authority (CPA) gym sa north reclamation area.

Dili basta-basta ang ilang kadaogan kay ilang gipanglubong ang ilang  mga kontra.

Ang Portmen walay puangod nga midemolis  sa Grancho Customs Brokerage sa iskor nga 96-48.

Si Jaypee Maunes  nga miburak og 19 puntos, 10 rebounds ug tulo ka assists maoy nangulo sa scoring sa Portmen nga walay kulba mikulit sa una nilang daog. Init sab kaayo nakaduwa si Boodee Monteño aron mokadlit og 14 puntos. 

Mitakod sab ang kainit ni Monteño ngadto ni Jay Oyao nga miduslit og 13 puntos ug ingon man ni Perry Niones nga mihaling og 11 puntos alang sa Portmen nga mipahaguros og mga puntos aron malubong og katunga ang Grancho.

Walay bisan usa ka player sa Grancho ang miiskor og double figures hinungdan sa ilang kapildihan.

Sila si Mark Gornez, Anthony Largosa ug Philip Rabago parehong miiskor lang og sayes puntos aron pangulohan ang Grancho nga tataw kaayong walay dag-anan.

Sa laing bahin, Rollway/Abay-Abay yano sab nga milansang sa una nilang daog human gilubong ang Alin Team B sa iskor nga 86-57 sa pagpangulo ni Nimrod Amorin nga mitimbre og 16 puntos nga igo kaaayo alang kaniya aron ilhong  best player of the game.

Sila si Glenn Urbina ug Alain Tarona mitampo'g 15 ug 10 puntos matag usa alang sa Rollway/Abay-/Abay.

Ang napildeng Alin Team B gipangulohan nilang Albert Gamao ug Justine Toring nga nagkumboya'g 21 puntos.

Sa laing bahin, ang Alas Logistics Corp. maoy  midaog sa best in uniform, samtang sila si Ivy Topic, Mia Tamayo ug   Keysa  de  Mesa sa  Alburo/Pimentel Customs Brokerage ang napiling   best muses.

PUNTOS MATAG USA

Unang duwa:

PORTMEN (96) – Maunes 19, Monteño 14, Oyao 13, Niones 11, Rodriguez 9, Taborada 8, Diaz 7, Gabica 3, Abayon 2.

GRANCHO (48) – Gornez 6, Largosa 6, Rabago 6, Remonde 5, Cabanada 5, Manlosa 4, Garde 4, Matibag 3, Aragon 2, Monterde 2.

Ikaduhang duwa:

ROLLWAY (86) – Amorin 16, Urbina 15, Tarona 10, Sanchez 9, Palad 7, Abay-abay 4, Yncierto 4, Jamolin 4, Palad 2.

ALIN TEAM B (57) – Gamao 11, Toring 10, Laurel 6, Castillo 4, Colegado 4, Nudalo 2, Baltonado 2.