Blatche niduwa nga dunay dakong problema

CEBU, Philippines — Mahimong masabot ang dili kaayo nindot nga performance  ni Andray Blatche sa FIBA World Cup human nasayran nga aduna kini gipas-ang duha ka bug-at nga suliran sa wala pa siya miduwa og balik sa Gilas Pilipinas.

Si Blatche nga miuli sa Estados Unidos sa wala pa mikuyog sa Gilas niadtong Hulyo, giingon nga naguol ug nahasol human masayod nga adunay sakit nga 'cancer' iyang inahan. 

Napun-an pa kini sa mas sakit nga balita kay iyang nasayran nga ang ikaduha untang anak nga gihimugso sa iyang uyab dili iya. 

"My mom is fighting cancer and I found out my two-year old son is not mine. I was going through deep depression," tipik sa mensahe ni Blatche nga iyang gibutang sa social media.

Sa iyang bahin, ang point guard sa Gilas nga si Kiefer Ravena nagtuo nga posibleng katapusang World Cup na ni Blatche sa Gilas. Nagtuo si Ravena nga mokuha og bag-ong naturalized player ang  Gilas alang sa 2023 World Cup diin  ang Pilipinas nakaangkon na og luna isip usa ka host.

Mapasalamaton hinuon ang iyang mga teammates ni Blatche ug dili kini angay nga sawayon tungod kay dako kini og natampo sa pagkabuhi sa basketbol sa nasud. 

"Kuya Dray has done a lot for our country. We’re very grateful for his sacrifice and hard work," dugang ni Ravena.