UV nagpanikad na

CEBU, Philippines – Nagpanikad na ang University of the Visayas (UV) Green Lancers nga modepensa sa ilang korona diin ilang puntariya ang pagkulit og talagsaong 'grandslam' sa gikahinaman nga Cebu Schools Athletic Foundation, Inc. (CESAFI) Season 19 nga mosikad karon  Sabado, Agosto 31 diha sa Cebu Coliseum.

Apan sayod si UV coach Gary Cortes nga dili sayon nga tahas ang ilang sagubangon kay ang ubang teams naglungot-lungot man sab nga palayason sila sa trono nga ilang gilumloman sa miaging tulo ka tuig.

"Nag-train gyud mi anang four-peat, apan for sure ang ubang teams are there not only to participate but also to compete," matud pa ni Cortes atol sa pormal nga paglusad sa CESAFI Season 19 kagahapon sa Maco Polo Plaza Cebu.

"Mao nang ginaingon nga sayon estoryahon apan lisud buhaton," dugang pa ni Cortes.

Usa sa labing lig-on nga makabangga sa UV Lancers mao ang Southwestern University (SWU)-Phinma ni coach Mike Reyes nga maoy nakampiyon sa Partner's Cup, ang pre-season sa liga.

Apan sama ni Cortes, mapaubsanon sab kaayo si Reyes nga mitubag sa dihang gisukna kon unsay ilang tsansa nga manghawod na sab sa regular season.

"It doesn't follow that if you win the pre-season, you will also win in the regular season," sumala pa ni Reyes.

Gawas sa Lancers ug Cobras, mokumbati sab sa collegiate division ang University of San Carlos (USC) Warriors ni coach Bong Abad, University of Southern Philippines Foundation (USPF) Panthers ni coach Brian Jereza, University of San Jose-Recoletos (USJ-R) ni coach Leode Garcia, Cebu Institute of Technology-University (CIT-U) Wildcats ni coach Edsel Vallena ug University of Cebu (UC) Webmasters ni coach Yayoy Alcoseba.

Sa high school division, ang UC Junior Webmasters manalipod sa ilang titulo batok sa USC Baby Warriors, UV Baby Lancers, CIT-U Wildkittens, USJ-R Baby Jaguars, SWU-Phinma Baby Cobras, Don Bosco Greywolves, Cebu Eastern College (CEC) Dragons, UCLM ug Sacred Heart School-Ateneo de Cebu (SHS-AdC) Magis Eagles.