San Miguel legend misaway ni Santos

CEBU, Philippines — Nadismaya si PBA legend Danny Seigle  ngadto ni  Arwind Santos nga kontrobersyal tungod sa iyang pagbugal-bugal ni TNT KaTropa import Terrence Jones.

Ang forward sa San Miguel Beermen nga si Santos gipamulta niadtong Huwebes ni PBA Commissioner Willie Marcial og P200,000 tungod sa iyang pagsinyas og 'onggoy' ngadto ni Jones nga usa ka African-American.

Gani ang San Miguel fans misaway sab sa gibuhat si Santos.

Si Seigle nga mihatag og unom ka kampiyonato sa San Miguel miingon nga dili na angay mahitabo pag-usab ang nabuhat ni Santos tungod kay makawala kini og respeto sa mga magduduwa ug sa liga. 

Hugtanong gisupak ni Seigle ang unang rason ni Santos nga igo lang niya gipalagpot si Jones aron maapektohan o maguba ang duwa niini sa nagpadayong PBA finals.

Ang Fil-American nga si Seigle miingon nga dili angay nga himuon og kataw-anan ang kolor sa panit sa usa ka tawo tungod kay usa kini ka dakong insulto.

"The primate gesture is demeaning and prejudicial. Antics that rely on stereotypes, bias or bigotry are inexcusable.We should encourage compassion, understanding and acceptance of difference," matud pa ni Seigle sa iyang social media account.

Sa iyang bahin, ang bigman sa Barangay Ginebra  nga si Joe DeVance nga adunay kaliwat nga African-American misaway usab sa gibuhat ni Santos ngadto ni Jones. 

===

USA batok Spain sa tune-up game karon

Lemuel P. Maglinte

CEBU, Philippines — Tutukan karon sa mga basketball fans ang  panag-abot sa duha ka World Cup title contenders   Team USA ug Spain karong adlawa didto sa California alang sa usa ka tune-up match.

Ang Team USA nga gibidahan nila ni Kemba Walker, Jayson Tatum, Jaylen Brown ug Khris Middleton mosuway pagpakita nga ang ilang koponan gihapon ang numero unong basketball sa kalibotan bisan pa og wala miduwa ang pipila ka mga superstars sama nila ni LeBron James, Stephen Curry, James Harden ug Anthony Davis.

Masukod hinuon ang abilidad sa bag-ong Team USA ni coach Gregg Popovich tungod kay banggaon nila ang mga beterano sa Spain sama nila ni Marc Gasol, Ricky Rubio ug Serge Ibaka.

Si Popovich miangkon nga dili sayon ang giagian karon sa USA team tungod sa kakuwang sa mga NBA stars nga mipakita og interes nga moduwa, apan salig gihapon siya nga usa ka solidong line-up ang ilang iparada didto sa China karong Agosto 31.