UC Webmasters kampiyon sa St. Augustine Cup
CEBU, Philippines – Ang University of Cebu (UC) Webmasters nakaipsot sa University of Southern Philippines Foundation (USPF) Panthers, 94-93 sa finals aron maghari sa 1st Brgy. Capt. Kirk Bryan Repollo Inter-Collegiate Basketball Tournament-St. Augustine Cup niadtong Miyerkules didto sa Emilio R.M. Jaca Sr. Sports Complex and Cultural Center sa Barangay Inayawan, Dakbayan sa Sugbo.
Ang eksplosibong pointguard nga si Darell Shane Menina maoy mihimo sa labing dako'g kadaot sa habig sa Panthers human siya miratsada og 26 puntos alang sa Webmasters.
Wala sab magpabitin si Tosh Sesay nga mitimbre og 24 puntos alang sa Webmasters nga nalubong og 13 puntos, 31-44, apan dali kaayong nakabawi hinungdan sa pagsikit nila ngadto na lang sa kuwatro puntos sa halftime, 42-46.
Dali nga gibalik sa Panthers ang dako nilang labaw, 55-44, apan ang Webmasters milusad og 27-12 rally hinungdan sa pag-abante niini og kuwatro puntos, 71-67 human sa tulo ka kuwarter.
Sikit kaayo ang kumbati sa duha ka protagonista sa hinapos nga bahin sa aksiyon.
Ang Panthers nakabawi human nabiyaan og 10 puntos, 74-84 hinungdan nga nakasikit sila og maayo, 93-94 sa nahibilin nga 29.4 segundos sa duwa.
Human masipyat ang mga tira sa Webmasters, duna pa unta'y tsansa ang Panthers nga modaog, apan wala masud ang undergoal shot ni Alje Mendez dayong kapupos sa oras.
Ang Webmasters ni coach Raul 'Yayoy' Alcoseba mibulsa og P25,000 sa ilang paglangkat sa titulo ning usa ka semanang torneyo nga gituyo aron pagdugang og lamas sa tinuig nga pista sa Inayawan agi'g pangilin sa minahal nilang patron St. Augustine de Hippo karong Agosto 25.
Si Lameen Swint mihipos og 26 puntos samtang sila si Neon Chavez ug Mendez mitali og 14 ug 12 puntos alang sa Panthers.
- Latest