Durant wala mipasangil sa Warriors

CEBU, Philippines – Si two-time Finals MVP Kevin Durant wala mibasol sa Golden State Warriors sa nahiaguman niyang Achilles injury atol sa NBA Finals, segun pa sa taho sa Yahoo Sports kagahapong adlawa.

Kahinumduman, nga si Durant na-injured atol sa Game-5  sa  NBA Finals sa iya mismong  pagbalik gikan sa injury sa iyang bagtak nga nakapalingkod kaniya sud sa usa ka bulan.

Ang 30-anyos nga All-Star forward nga mituboy sa Warriors ngadto sa duha ka sagunson nga kampiyonato niadtong 2017 ug 2018, mikumpisal ngadto sa Yahoo Sports nga wala siya'y ikasulti batok sa Warriors sa desisyon niini nga paduwaon siya sa Game-5 batok sa Toronto Raptors sa ilang 'best-of-seven' finals series niadtong Hunyo.

"Hell, no. How can you blame the Warriors?" matud pa ni Durant agi'g pagdepensa sa kanhi niya koponan. "Right when the series started, I targeted game five. Hell, nah. It just happened."

"Nobody was responsible for it. It was just the game. We just need to move on from that idea because I'm going to be back playing," dugang pa ni Durant nga mipirma og upat ka tuig nga kontrata uban sa Brooklyn Nets nga mibalor og $164 million sa miaging bulan.

Human ang Warriors gihuboan sa ilang korona sa Raptors ubos sa liderato ni Kawhi Leonard, si Durant mipahimangno nga mao na kadto ang katapusang pagtaak sa Warriors sa finals ilabi kay si Leonard mitapon ngadto sa LA Clippers uban ni Paul George.

Hinuon, dili gihapon kabintahaan ang puwersa sa Warriors gumikan sa presensiya nilang Stephen Curry, Klay Thompson ug Draymond Green. 

Bisan tuod og dili pa kaduwa si Thompson sunod season, apan anaa pa sila'y laing armas nga ikapabuto batok sa ilang mga karibal sa pangan ni D'Angelo Russell.