Pacquiao gidugokan sa fans

CEBU, Philippines – Gidugokan sa iyang mga fans si Pinoy ring legend Manny Pacquiao atol sa tradisyonal nga 'grand arrival' nila ni Keith Thurman  pag-abot didto sa lobby sa makasaysayanong MGM Grand Hotel and Casino  sa Las Vegas, Nevada niadtong Miyerkules sa gabii.

Sama sa naglagiting kainit nga mipasulabi sa gibansagan nga Sin City mao sab ang kainit sa paghangop ni Pacquiao sa iyang mga dumadapig nga nag-atang kaniya sa MGM aron lamang makakita, makapapirma og authograph ug makakuha og hulagway uban sa ilang idolo.

Simple ra kaayo si Pacquiao ug gani nagsul-ot lamang kini og puting t-shirt samtang mitimbaya sa iyang mga fans.

Sa usa ka higayon, gihubo ni Pacquiao ang iyang senina aron ipakita sa kadaghanan ang solidong kurbada sa iyang lawas timaan nga kondisyon kaayo siya alang sa usa sa labing dako nga away sa iyang karera.

Samtang si Pacquiao kalmado kaayo, si Thurman padayon nga nangantiyaw ni Pacquiao pinaagi sa pagsul-ot  og t-shirt nga dunay printang "Game Over" atol sa ilang paghiabot sa MGM Grand.

Ang gibuhat ni Thurman tataw nga makapainit og samot sa tensiyon tali sa duha ka boksidor ilabi na kay sa sayo pa mibahad na siyang daan nga iyang ilansang ug paretayron si Pacquiao, butang nga nakapabokal sa dugo sa bugtong eight-division world champion sa kasaysayan sa boksing.

Sila si Pacquiao ug  Thurman gikatakda nga magbinukbukay alang sa WBA unified welterweight title karong Domingo, Hulyo 21, didto sa MGM Grand.