Blatche kada adlaw magpraktis sa Gilas

CEBU, Philippines – Ang naturalized center sa Gilas Pilipinas nga si Andray Blatche mopahigayon og ensayo matag adlaw  aron maseguro iyang kaandam alang sa World Cup sa sunod buwan didto sa China.

Si Blatche nga miabot niadtong Sabado, miingon nga dili igo ang duha matag semana nga ensayo uban sa Gilas hinungdan nga nangayo siya og ensayo kada adlaw. 

Gumikan niini, si Gilas coach Yeng Guiao mipauban sa ex-NBA bigman sa NLEX Road Warriors nga nag-ensayo alang sa Governors' Cup.

Ang NLEX wala na'y tsansa nga mosud sa playoffs sa PBA Commissioner's Cup, apan walay hunong ang ensayo sa mga players niini ug nga haom si Blatche aron makapalig-on sa iyang kondisyon.

Si Blatche miingon nga sa dili pa ang World Cup, mas pangandaman niya ang ilang tune-up tournament didto sa Spain diin naghinam-hinam siya nga ikabangga ang mga kanhi niya karibal sa NBA nga mao ang managsuong Marc ug Pau Gasol nga maoy haligi sa Spain national squad.