'Twice-to-beat' tuyo sa KaTropa
CEBU, Philippines – Laraw sa TNT KaTropa nga hingpit na nilang kandadohan ang ilang luna sa top two sa standing aron makuha ang twice-to-beat advantage sa playoffs sa PBA Commissioner's Cup.
Ang KaTropa nga adunay 7-1 nga baraha gustong makabaton og twice-to-beat sa quarterfinals nga mohatag kanila og sayon nga dalan paingon sa ilang damgo nga makabalik sa PBA finals.
Ang KaTropa nga gibidahan sa ilang import ug kanhi Houston Rockets forward nga si Terrence Jones makigsangka sa Rain or Shine Elasto Painters sa alas-7 sa gabii human sa duwa tali sa Columbian Dyip ug NorthPort Batang Pier nga sugdan sa alas-4:30 sa hapon didto sa Smart Araneta Coliseum.
Timaan sa nindot nga performance ni Jones, siya na lang ang usa sa upat sa nahibiling import nga wala pa ilisi sa conference uban ni Rain or Shine import Denzel Bowles, Charles Rhodes (San Miguel) ug Justin Brownlee (Ginebra).
Dili hinuon mokompiyansa ang TNT sa Rain or Shine tungod kay ang Painters seguradong mobuhat sa tanan aron makuha ang daog. Ang Painters natagak sa ikawalong dapit sa standing.
- Latest
