Doble demalas sa Batang Gilas

CEBU, Philippines — Doble demalas ang nasinati sa Batang Gilas sa una nilang duwa sa FIBA U19 World Cup kagahapon sa kadlawon didto sa Heraklion Arena sa Greece.

Gawas nga nakatilaw sila og 69-85 nga kaparotan batok sa home team nga Greece, nakahiagum usab og seryosong injury sa tuhod ang usa unta sa ilang mga sinaligan nga si Fil-Nigerian prospect AJ Edu. Ang 6-foot-10 teen sensation nadakin-as og naglisud na pagbarug sa first period.

Si Edu ang gitan-aw nga katimbang ni 7-foot-2 Kai Sotto, apan daw lisud na kini nga makatiwas pa sa torneyo. Si Sotto mirehistro og 13 puntos ug 10 ka rebounds, apan dili kini igo aron ihatud ang daog sa Batang Gilas tungod usab sa kadagko sa mga Greek players. Si Gerry Abadiano mitampo og 13 puntos, samtang si Dave Ildefonso adunay 12. Napakita hinuon sa mga Pinoy nga may abilidad sila nga makigbangga sa mga powerhouse junior teams sa kalibutan dihang milabaw sila og 22-12 sa first period, apan hinay-hinay sila nga nahubsan og kusug tungod usab sa kadagko sa ilang kaatbang. Ang Batang Gilas musuway pagbangun karong adlawa sa ilang pakigbangga sa Argentina.