Bida si Prosper

Dyip sinagasaan ang Beermen sa OT

MANILA, Philippines — Kinailangan ng Columbian ang five-minute extra period para tapusin ang kanilang tatlong sunod na kamalasan at makasilip ng tsansa sa quarterfinals.

Humakot si import Lester Prosper ng 40 points, 13 rebounds at 3 assists para tulungan ang Dyip na sagasaan ang San Miguel Beermen sa overtime, 134-132  sa 2019 PBA Commissioner’s Cup kahapon sa Smart Araneta Coliseum.

Inilista ng Columbian ang kanilang ikalawang panalo sa walong laro habang nalasap ng San Miguel ang pa­ngalawang dikit na kabiguan para sa 2-5 baraha.

Kumamada si No. 1 overall pick J Perez ng 34 mar­kers, 8 boards, 4 assists at 4 steals habang may 27 points si Rashawn McCarthy para sa Dyip, inilubog ang Beermen sa 84-70 sa 3:50 minuto ng third period bago nakadikit sa pagtatapos nito, 82-88.

“Ibinigay lang namin ang buong effort namin,” sabi ni Perez, naglista rin ng 8 boards, 4 assists at 4 steals. “Siyempre, kapag kalaban mo ang magaling na team dapat galingan mo rin.”

Ang jumper ni Glenn Khobuntin ang nagbigay sa Columbian ng 118-115 abante sa huling 10.4 segundo kasunod ang three-point shot ni Arwind Santos sa nalalabing 1.5 segundo para akayin ang San Miguel sa extension, 118-118.

Kinuha ng Dyip ang 124-120 bentahe sa 3:36 minuto ng extra period bago nakadikit ang Beermen sa 130-132 agwat sa natitirang 33.6 segundo.

Lumipad naman si Perez para sa kanyang drive na nagbigay sa Columbian ng 134-130 kalamangan sa huling 12.7 segundo.