Joshua desperadong makig-rematch ni Ruiz
CEBU, Philippines — Desperado kaayo si Anthony Joshua (22-1, 21KOs) nga makig-rematch ni Andy Ruiz Jr. (33-1, 22KOs).
Mao kini ang gipadayag sa nahagba nga kampiyon usa ka adlaw human siya gipakauwawan sa Mehikanong boksidor.
Sa makapakurat nga kadaogan nga mitay-og sa kalibotan sa boksing, si Ruiz mipatikangkang sa kanhi wa'y pildeng si Joshua upat ka higayon aron langkaton ang IBF, IBO, WBA ug WBO heavyweight titles taliwala sa nakugang nga mga nanan-aw didto sa Madison Square Garden sa New York niadtong Domingo.
Obligado hinuon si Ruiz nga mohatag og rematch ni Joshua kay nalatid man kini sa gipirmahan nilang kontrata.
Gani selyado na kini karong Nobiyembre o Disyembre didto sa United Kingdom.
Matud pa ni Joshua nga iyang timbang-timbangon ang sitwasyon ug istudyohan kun unsay nahimo niyang sipyat nga miresulta ngadto sa wala damha niyang kapildihan.
Misaad si Joshua nga iyang kat-onan og leksiyon ang maong kapildihan ug nga mobalik siya nga mas maayo ug mas mangtas pa nga boksidor.
Sa pagka karon, bugtong nasilsil sa alimpatakan ni Joshua mao ang pagbawi sa tulo ka bakus nga giilog kaniya ni Ruiz. (BANAT NEWS)
- Latest
