Alab playoff game sa Hoopsdome
CEBU, Philippines – Tungod sa walay puas nga suporta sa Cebu fans sa miaging duha nila ka duwa sa elimination round, ang defending champion Alab Pilipinas mopahigayon sa ilang home game pagsugod sa playoffs sa ASEAN Basketball League karong Marso 29 didto sa HoopsDome sa Dakbayan sa Lapu-Lapu.
Kini ang ikatulong higayon nga mopahigayon og home game ang Alab sa Hoopsdome human sa ilang duha ka daog sa maong binyu batok sa Wolf Warriors sa China ug Singapore Slingers.
Ang ikasangka sa Alab magdepende sa resulta sa nagpadayong elimination round. Ang Alab nga nag-una sa standing uban ang 18-5 record makigharong sa eight seed sa first round. Kinahanglan hinuon nila nga panalipdan ang No. 1 seed ilabi na nga hinay-hinay nga migukod ang Formosa Dreamers nga anaa sa ikaduha sa baraha nga 17-6.
Ang mga tiket sa maong playoff game gisugdan na og baligya didto sa Lapu-Lapu City Tourism Office ug Global Link Travel and Tours. Nagkantidad kini og P350 sa upper box, P600 sa lower box ug P1,200 sa VIP.
- Latest
