Clarkson gusto moduwa sa Gilas
CEBU, Philippines – Gipadayag ni Cleveland Cavaliers star Jordan Clarkson nga gusto siyang moduwa pag-usab sa Gilas Pilipinas sa 2019 World Cup didto sa China sa Agosto 31.
Mao kini ang reaksiyon sa Fil-American nga si Clarkson sa kalampusan sa Gilas pagsakmit og luna sa World Cup human gilubong ang Kazakhstan atol sa final leg sa FIBA qualifiers.
Gamit iyang social media account, si Clarkson midayeg sa iyang teammates sa Gilas ug gikalipay niya tungod kay may kahigayonan siya nga moduwa sa World Cup alang sa iyang nasud.
Bisan og taas pa og estoryahon ug kinahanglan pa nga mananghid ang Samahang Basketbol ng Pilipinas (SBP) sa FIBA ug NBA nga paduwaon si Clarkson sa World Cup, ang 6-foot-5 nga NBA standout seguro na nga makaduwa uban sa nasudnong koponan.
"Congrats to my bros and the country. Such an honor for the country qualifying for the World Cup. So hyped," matud pa ni Clarkson. "Hope to see you guys in China!!!"
Si Clarkson miduwa sa Gilas sa Asian Games sa miaging tuig, apan isip usa ka naturalized center.
Paningkamotan sa SBP nga makaduwa isip regular player si Clarkson tungod kay aduna na kini Philippine passport sa wala pa mag-edad og 16-anyos.
Kun mahitabo kini, adunay posibilidad nga magdungan og duwa si Clarkson ug Andray Blatche sa Gilas.
- Latest
