Thompson mibida sa Warriors

CEBU, Philippines – Mirehistro og 43 puntos si Klay Thompson diin lakip niini ang pito ka tres aron pangulohan ang Golden State Warriors nga mikastigo sa New York Knicks, 122-95, kagahapon didto sa Oracle Arena sa Oakland California.

Ang Warriors nakalihay sa ikaupat unta nila nga sunod-sunod nga pilde sa kaugalingon nilang balwarte.

Si Stephen Curry mihimo sa labing una niyang double-double sa season sa iyang 14 puntos ug 14 ka assists, samtang si Kevin Durant mihimo og 24 puntos alang sa Warriors nga nahimutang karon sa ikaduhang dapit sa West Conference sa ilang 27-14 win-loss record sunod sa Denver Nuggets (27-12).

Ang New York napilde na og 10 ka sunod-sunod batok sa Golden State.

Samtang didto sa Toronto, Canada, gipatapsingan sa home team nga Raptors ang Atlanta Hawks, 104-101, sa pagpangulo Kawhi Leonard nga adunay 31 puntos.

Balanse nga opensa ang gipakita sa Raptors dihang mirehistro usab og double-figures sila si Pascal Siakam kinsa adunay 13, Kyle Lowry nga adunay 16 ug Ogy Anunoby nga adunay 14 ug Serge Ibaka nga mihimo og 13 puntos.

Ang Raptors pabiling galawig sa liga sa ilang 31-12 nga baraha.

Sa ubang mga resulta, ang Cleveland Cavaliers nasugamak batok Indiana Pacers, 115-123, gilubong sa Philadelphia 76ers ang Washington Wizards, 132-115, midaog ang Nuggets batok Miami Heat, 103-99, ang Sacramento Kings mipasawop sa Phoenix Suns, 115-111, ang LA Clippers mipapas sa Charlotte Hornets, 128-109, samtang ang Minnesota Timberwolves mipahilum sa Oklahoma City Thunder, 119-117.