Wilder dunay misyon batok Fury

CEBU, Philippines — Sa edad nga 33 anyos, si WBC heavyweight champion Deontay Wilder nakapatik og impresibong rekord sa mabulukon niyang karera.

Wala pa siya'y pilde sa 40 ka away diin 39 sa iyang mga biktima iyang gipakamang. Dili sab malalis ang kakusog ug kabangis sa iyang kumo.

Apan bisan pa man niining tanan, wala pa gihapon makuha ni Wilder ang atensiyon sa mga sports fans didto sa Amerika.

Bugtong konsolasyon ni Wilder nga kanunay siyang masaypan nga siya mao si NBA superstar LeBron James.

Mao kini ang misyon nga sagubangon ni Wilder sa dihang iyang sangkaon si Tyson Fury (27-0, 19KOs) sa eksplosibong sangka tali sa duha ka wa'y pildeng mga higante karong Domingo didto sa Staples Center didto sa Los Angeles, California.

Sa labing unang higayon, si Wilder moaway sa main event sa usa ka  'pay-per-view' card.

Mao na kini ang iyang higayon nga ipailaila sa kalibotan kun kinsa siya ug kun unsa gyud kamangtas ang gahum sa iyang kumo kay dekalibre man sab ang iyang kontra.

Mao nang naglungot-lungot si Wilder nga kastiguhon si Fury gumikan kay mao kini ang magsilyo sa iyang pagkabanggiitan ug usa ka paagi aron siya yukboan sa hingpit sa mga fans.

Labaw sa tanan, dako'g posibilidad nga iyang mabalik ang init nga paghigugma sa  Amerika ngadto sa heavyweight boxing kun ugaling iyang paludhon si Fury sa iyang atubangan.