Tinagsip sa NBA

Green, Durant nagkauli na

CEBU, Philippines – Nagkauli na ang maayong kabubut-on sa duha ka superstars sa Golden State Warriors nga sila si Draymond Green ug Kevin Durant.

Kahinumduman, nga nagkalalis ang duha sa naghinapos nga bahin sa katapusang kuwarter atol sa ilang kaparotan batok sa LA Clippers sud sa overtime gumikan kay nasuko si Durant ngadto kang Green gumikan kay gilumluman niini ang bola inay nga ipasa kini ngadto kaniya nga posibleng makapadaog pa unta kanila. Miresulta kini ngadto sa pagkasuspenso og usa ka duwa ni Green. Apan kagahapon, si Green na mismo ang mipadayag nga ilang nang gilubong ni Durant sa kalimot ang nahitabo.

Rondo gikatakdang operahan

Ang point guard sa Los Angeles Lakers nga si Rajon Rondo gikatakda nga operahan aron ayuhon ang nabuak niining tuong kamot.

Gumikan niini, si Rondo dili makaduwa sa sud sa pipila ka semana. Nahiaguman niya ang maong injury sa dihang misuway siya og kawat sa bola sa ikaupat nga kuwarter atol sa ilang kadaogan batok sa Portland TrailBlazers niadtong Huwebes. Dili malalis nga dako og tabang si Rondo sa Lakers nga makita sa average niining 8.5 points, 6.5 assists, 4.5 rebounds ug 1.2 steals matag duwa.