Jaguars miangkon No.1 spot

CEBU, Philippines – Gilat-an sa University of San Jose-Recoletos (USJ-R)Jaguars ang Cebu Institute of Technology-University (CIT-U) Wildcats, 106-77 paghuman sa duha ka hugna nga eliminasyon sa collegiate division sa 18th Cebu Schools Athletic Foundation, Inc. (CESAFI) men's basketball tournament kagabii diha sa Cebu Coliseum.

Bugti sa ilang kadaogan, ang Jaguars nakamugna og 'triple-tie' uban sa two-time defending champion University of the Visayas (UV) Green Lancers ug University of Cebu (UC) Webmasters nga parehong adunay 9-3 win-loss records.

Apan ang USJ-R maoy miangkon sa No. 1 spot kortesiya sa mas taas niining tie-breaker gamit ang Olympic quotient system.

Matud pa ni CESAFI deputy commissioner Danny Duran nga ang Jaguars mao ang dunay highest quotient nga 1.0839 aron molugwa nga topnotcher sa labing unang higayon sa kasaysayan sa CESAFI.

Ang Lancers maoy ikaduha uban ang .9966 ug nangiwit ang Webmasters uban ang .9187.

Gumikan niini, ang Jaguars ug ang Lancers mao ang makapahimus sa 'twice-to-beat' advantage sa tagsa-tagsa nila ka mga karibal sa crossover semifinals sunod semana.

Ang Jaguars makigtige batok sa University of San Carlos (USC) Warriors o dili ba sa University of Southern Philippines Foundation (USPF) Panthers, samtang ang Lancers makigharong batok sa Webmasters.