Jaguars batok Panthers

CEBU, Philippines – Ang University of  San  Jose-Recoletos (USJ-R) Jaguars naglaraw nga mokulit og mahinungdanong daog nga magseguro kanila og luna sa Top 2 sa dihang ilang harungon ang University of Southern Philippines Foundation (USPF) Panthers sa 18th Cebu Schools Athletic Foundation, Inc. (CESAFI) men's basketball tournament karong adlawa diha sa Cebu Coliseum.

Human sa 74-57 nilang demolisyon sa University of Cebu (UC) Webmasters niadtong Huwebes sa gabii, ang Jaguars miinat sa ilang rekord ngadto sa 7-3, alkanse lamang og usa ka duwa sa University of the Visayas (UV) Green Lancers nga nagkupot na og 8-3 nga baraha human nakaipsot batok sa  University of San Carlos (USC) Warriors, 81-78. Ang Webmasters nadakin-as sa 9-2.

Kun kuwentahon og maayo, ang Jaguars nanginahanglan na lang og usa ka daog aron hingpit na silang maka-angkon og 'twice-to-beat' advantage sa semis.

Kini gumikan kay ang Jaguars mao man ang nakabentaha kabahin sa quotient kun ugaling mag-triple tie sila sa Webmasters ug Lancers gumikan kay ila man gilubong ang duha ka teams og 16.5 points matag duwa.

Kini nagpasabot nga ang Jaguars kinahanglan na lamang nga modaog og usa sa katapusan nilang duha ka duwa aron malandig sila sa Top 2 nga dunay twice-to-beat edge sa Final Four.

Inilog man tuod, apan ang Jaguars angayan gihapon nga mangandam sa usa ka dakong gubat batok sa Panthers nga obligado sab nga modaog aron pahayagan ang ilang misyon nga makasud sa Final 4 sa labing unang higayon sa ilang kasaysayan.

Bitbit ang 5-5 record, ang Panthers anaa karon sa sikit nga kumbati batok sa 4-7 Warriors alang sa ikaupat ug katapusang luna sa semis sa collegiate division.

Samtang hapit na mahuman ang duha ka hugna nga eliminasyon, misamot og kakulbahinam ang aksiyon puwera na lang sa non-bearing match tali sa Cebu Institute of Technology-University (CIT-U) Wildcats ug Southwestern University (SWU)-Phinma Cobras karong alas 5:30 sa hapon.

Sa mga duwa sa high school, ang Baby Panthers (2-4) makighamag batok sa Baby Cobras (1-6) sa pasiunang duwa sa ala-1 sa hapon, samtang ang Baby Jaguars (4-3) makigtigi batok sa Wildkittens (2-5) sa alas 2:30 sa hapon.