6-0 sweep tuyo sa Webmasters
CEBU, Philippines — Laraw sa University of Cebu (UC) Webmasters nga moposte og 6-0 sweep sa dihang ilang sangkaon ang University of Southern Philippines Foundation (USPF) Panthers pagtapos sa unang hugna sa eliminasyon sa collegiate division sa 18th Cebu Schools Athletic Foundation, Inc. (CESAFI) men's basketball tournament karong adlawa diha sa Cebu Coliseum.
Human gibuntog ang two-time defending champion University of the Visayas (UV) Green Lancers niadtong Sabado, padayong nag-inusara sa liderato ang Webmasters bitbit ang 5-0 nga baraha.
Buot sa Webmasters nga panalipdan ang limpiyo nilang rekord, apan angay silang magmatngon batok sa Panthers sa duwa nila sa alas 6:45 sa gabii nilang engkuwentro.
Sa gitangag niining 4-1 win-loss record, ang Panthers tataw nga nakaangkon og respeto sa ilang mga karibal. Sukwahi sa naandan nilang imahe nga kulatahunon, gipakita sa Panthers nga usa na sila ka lig-on nga puwersa ug dili na basta-basta mayano nga kontra.
Lisud hinuon nga hagit ang sagubangon sa Panthers batok sa Webmasters nga gibitoonan ni 6-foot-7 Cameroonian import si Frederick Elombi ug ingon man bangis nga four-guard line-up nga silang Darell Shane Menina, Paul Galinato, John Calvin Jabello ug Justine Dacalos.
Si UC coach Yayoy Alcoseba makasandig sab nilang Joven Tagudin, Peter Paul Codilla, Dave Peligrino, Marc Obado ug Fernando Abapo.
Samtang ang Panthers ubos sa liderato ni Nigerian import Rich Managor, makalaum nilang RR Cauba, Kenneth Cada, Lugie Cuyos, Karl Langahin, Rendy Sarahina, Roy Quiachon, Alje Mendez, John Paul Batac ug Mike Patalinghug.
Sa pasiunang duwa sa alas-5:15 sa hapon, ang University of San Jose-Recoletos (USJ-R) Jaguars makigharong sa University of San Carlos (USC) Warriors.
Ang Jaguars dunay 4-1 record, samtang ang Warriors naglukdo og 2-3 nga baraha. (BANAT NEWS)
- Latest
