Dragons mipakurat sa magis Eagles, Baby Lancers daog dayon
CEBU, Philippines — Ang Cebu Eastern College (CEC) Dragons mipakurat sa four-time champion Sacred Heart School-Ateneo de Cebu (SHS-AdC) Magis Eagles, 49-39, samtang ang defending champion University of the Visayas (UV) Baby Lancers miabli sa ilang kampanya pinaagi sa pag-iskor og daog sa 18th Cebu Schools Athletic Foundation, Inc. (CESAFI) men's basketball tournament kagahapon diha sa Cebu Coliseum.
Si Jansen Tiu miburak og 14 puntos ug si Ric Rodriguez mibugha og 11 puntos sa Dragons nga mao karon ang temporaryong naghari sa liderato sa juniors division bitbit ang 2-0 record.
Ganado kaayong moduwa human gipaksit ang University of Southern Philippines Foundation (UPSF) Baby Panthers, 71-61
niadtong Agosto 26, ang Dragons mibugwak dayon og nagkayong opensa pagsugod sa duwa ug wala na molingi pa sukad miposte og sayong 18-8 nga labaw.
Sa laing bahin, si Joshua Yerro mipabuto og 25 puntos ug si Gabriel Cometa mikadlit og 23 sa dihang gisugdan sa Baby Lancers ang pagdepensa sa ilang trono pinaagi sa pag-ihaw sa University of San Carlos (USC) Baby Warriors, 89-75.
Si reigning CESAFI Juniors MVP Beirn Anthony Laurente mitampo og 10 puntos sa Baby Lancers nga dominante kaayo gikan sa pagsugod.
Human sa sayong 24-14 nga ataki, ang Baby Lancers miinat pa sa ilang labaw ngadto sa 18 puntos sa halftime, 45-27 nga nakapabarag sa Baby Warriors.
- Latest
