UC Webmasters milansang sagunson duha ka daog

CEBU, Philippines – Ang University of Cebu (UC) Webmasters  nakasungasong sa bangis nga opensa sa University of San Jose-Recoletos (USJ-R) Jaguars sa hinapos nga bahin sa duwa aron makaipsot, 72-64  sa 18th Cebu Schools Athletic Foundation, Inc. (CESAFI) basketball event  kagabii diha sa Cebu Coliseum.

Ang mga tadhang guwardiya nga sila si John Calvin Jabello, Darrell Shane Menina ug Justine Dacalos maoy nakahimo og dakong kadaut sa kampo sa Jaguars sa dihang ang Webmasters miangkon sa sayong labaw sa collegiate division bitbit ang 2-0 record.

Si Jabello mipabuto og 21 puntos, si Menina miiskor og 17 ug si Dacalos midugang og 14 puntos alang sa Webmasters nga miabli sa ikaduhang kuwarter pinaagi sa  12-0 run aron pagposte og 24-9 nga labaw. Sa maong pagratsada sa UC, wala nila paiskora ang USJ-R sud sa dul-an siyete minutos.

Ang UC nakatilaw sa labing dako nilang labaw, 61-40 sa katapusang 7:12 sa duwa.

Sila si RJ Dinolan ug reigning CESAFI Seniors MVP Jaybie Mantilla nagkumboya'g 33 puntos sa pilderong  Jaguars.