Wade gustong magpabilin sa Heat
CEBU, Philippines — Kon ugaling si Dwayne Wade moduwa karong umaabot nga NBA season, gusto niining magsul-ot gihapon sa uniporme sa Miami Heat.
Sa dihang nahinabi sa mga tigbalita atol sa Jr. NBA World Championship, si Wade mipahibawo nga wala pa siya magtakda og panahon aron mohukom kon mobalik pa ba siya sa Heat karong season.
Iya hinoon gitataw nga ang Heat mao lamang ang team nga iyang gikonsidera.
Sila si Wade ug Udonis Haslem, nga parehong mosud sa ika-16 nilang season sa NBA kon sila mopadayon pa og duwa, wala pa kapirma og kontrata mga unom ka semana sa dili pa magsugod ang ilang training camp.
Si Haslem miduwa sa tibuok niyang karera uban sa Heat, samtang si Wade mitapon sa Chicago Bulls human midaog og duha ka kampiyonato uban sa Heat sa panahon nilang LeBron James ug Chris Bosh.
Nagkauban sila og balik si James uban sa Cleveland Cavaliers sa miaging tuig apan nalandig ra sab og balik sa poder sa Heat.
Si Wade mipadayag nga wala siyay oras nga gitakda aron mohimo og desisyon kabahin sa ugma sa iyang karera apan ang Heat daan nang mipahibawo nga gusto niining kuhaon og balik sila si Wade ug Haslem. (BANAT NEWS)
- Latest
