Cometa migiya sa Baby Lancers
CEBU, Philippines – Si Gabriel Cometa mikutlo og 17 sa iyang 26 puntos sa first half sa dihang gibuntog sa University of the Visayas (UV) Baby Lancers ang Active Casino-University of San Jose-Recoletos (USJ-R) Baby Jaguars, 95-86 sa 2018 Cebu Schools Athletic Foundation, Inc. (CESAFI) Partner's Cup kagabii diha sa Cebu Coliseum.
Sa sinugdanan pa lamang, nindot na ang gipakitang labok ni Cometa diin siya mipupo og 10 puntos sa unang kuwarter nga maoy nahimong hagdanan sa Baby Lancers ngadto sa 26-14 nga labaw.
Mibawos hinuon ang Baby Jaguars sa ikaduhang kuwarter hinungdan nga nakasikit sila ngadto sa siyete puntos sa iskor nga 38-45 atol sa halftime.
Nabalikan hinuon sa ilang kainit ang Baby Lancers pagsugod sa second half hinungdan nga ila pang nainat ang ilang bentaha ngadto na sa 15 puntos, 73-58 paingon sa katapusang 10 minutos sa duwa.
Wala na molingi pa sukad niadto ang Baby Lancers dayon na ngadto sa pagkulit sa ikaduha nilang sunod-sunod nga daog.
Si Mar Leandro Actub miamot og 18 puntos ug si Joshua Yerro mitampo'g 12 puntos sa Baby Lancers nga nagsolo na karon sa ikaduhang puwesto sa standing bitbit ang 2-1 nga baraha sunod sa 3-0 nga Organique California-University of Southern Phippines Foundation (USPF) Baby Panthers.
Samtang ang Baby Jaguars nasugamak sa ikaduhang sunod-sunod nga higayon sukad midaog sa una nilang duwa batok sa Mandaue Hotel-University of San Carlos (USC) Baby Warriors.
- Latest
