3rd round ra kutob

MAASIN CITY, Philippines — Atubangan sa liboan niya ka mga katagilungsod, si ‘Prince’ Albert Pagara mipakita nga nabalik na ang iyang kabangis ug andam na siya nga ipadayun ang iyang kampaniya paingun sa world title.

Ang ALA Boxing Gym star nga si Pagara (30-1, 20KOs) mituman sa iyang saad nga paspas ug dominanteng kadaugan human niya gipaundang sa third round ang taga-Ghana nga si Laryea Gabriel Odoi (20-3, 14KOs) aron masakmit ang bakanteng WBO Intercontinental junior featherweight title sa main event sa ‘Pinoy Pride 44: Laban sa Leyte’ fightcard niadtong miaging gabii didto sa Maasin City Gym.

Wa hatagi og bisan gamay nga tsansa ni Pagara si Odoi nga makaporma ug girapido dayon niya kini og mga bangis nga kinumo resulta sa kaduha nga pagkatumba sa Afrikano sa wala pa hingpit nga misurender ang trainer niini sa 2:30 sa third round.

Ang 24-anyos nga si Pagara nagkanayon nga grabe iyang gana paingun sa away diin tuyo gyud niya nga sayung tapuson si Odoi kinsa sa wala pa ang sangka mihagit sa Pinoy boxer nga pahamtangan siya sa labing una niyang knockout nga kapildehan.

"Sa una nga knockdown nakita na nako nga mahuman nako siya og sayu," matud pa ni Pagara. "Mibalik na akong gana ug gusto nako ipakita nga naulian nako ug ipadayun na nako ang damgo nga world title fight."

Si Pagara gusto nga daling mabalik isip top contender sa iyang dibisyon nga nawala human sa iyang sakit nga kapildehan sa mga kamot ni Mexican Cesar Juarez duha ka tuig na ang milabay.

Sa iyang bahin, si ALA Promotions President and CEO Michael Aldeguer giganahan sa iyang nakita sa iyang batos ug misaad kini nga hatagan pa og mga dagkung away si Pagara.

“I like it. I saw Albert’s swagger again and that is a good thing. He didn’t make the fight competitive, but he showed to us that he is on another level compared to Odoi,” segun pa ni Aldeguer. “We are looking to give him another test by putting him on the undercard of Donnie Nietes’ next fight in August.”

Sama ni Pagara, ang ALA rising star nga si Jeo ‘Santino’ Santisima (16-2, 14KOs) sayun ra usab nga midispatsar ni Thai Likit Chane (16-7, 10KOs) sa third round aron malabni ang bakanteng WBO Oriental super bantamweight belt.

Sa undercards, ang maguwang ni Albert nga si Jason ‘El Nino’ Pagara (41-3, 26KOs) mi-KO usab sa third round ni Indonesian Wellem Reyk (19-19, 5KOs) , samtang si‘King’ Arthur Villanueva (32-3, 18KOs) mikulata ni Ren-Ren Tesorio (16-13, 4KOs) kinsa miundang sa seventh round, samtang si Melvin ‘Gringo’ Jerusalem (13-2, 8KOs) mipahagsa ni Philip Cuerdo (10-5, 4KOs) sa round eight.(BANAT NEWS)