Mapua ika-2 biktima ang EAC
MANILA, Philippines — Nalusutan ng Mapua University ang Emilio Aguinaldo College, 77-74 para makopo ang ikalawang sunod na panalo sa 2018 FilOil Flying V Preseason Cup kahapon sa The Arena sa San Juan City.
Nagrehistro si Christian Bunag ng double-double na 17 points at 11 rebounds habang umasiste si Lawrence Victoria na nagsumite naman ng 14 markers, bukod pa ang anim na assists para banderahan ang Cardinals.
Bagsak ang Generals sa 0-1.
Inilampaso naman ng College of Saint Benilde ang Jose Rizal University, 104-83 upang masikwat ang unang panalo.
Nanguna si Yankie Haruna para sa Blazers matapos kumulekta ng 16 puntos tampok ang impresibong 9-of-9 sa free throw line kasama pa ang apat na steals at apat na rebounds.
Nagdagdag naman sina James Pasturan at Edward Dixon ng tig-13 puntos para sa Benilde na sumulong sa 1-0 sa Group B.
Maagang naglunsad ng atake ang Blazers nang ilatag nito ang 32-13 bentahe.
Mula rito ay hindi na lumingon pa ang Benilde para tuluyang pulbusin ang Heavy Bombers.
Naitala pa ng Blazers ang pinakamalaking kalamangan na 27 puntos, 87-60 sa ikaapat na kanto.
Nagtala sina Mark Dela Virgen at Karl Bordon ng tig-15 puntos para sa Heavy Bombers.
Lumasap naman ng ikalawang sunod na kabiguan ang Jose Rizal. (CCo)
- Latest
