Clippers, Raptors sulod na sa playoffs

CEBU, Philippines – Ang LA Clippers ug Toronto Raptors miposte og mahinungdanong daog batok sa tagsa-tagsa nila ka mga kontra kagahapong adlawa aron sa hingpit nilang pag-angkon og luna sa NBA Playoffs.

Si Jamal Crawford mipabuhagay og 28 puntos sa dihang gilabhan sa Clippers ang Utah Jazz, 108-95. Ang Clippers mi-inat sa ilang record ngadto sa 44-30 nga maoy nagselyado sa ilang puwesto sa playoff sa ikaunom nga sunod-sunod nga higayon.

Mi-abag ni Crawford sila si Blake Griffin ug Chris Paul nga nagkumboya og 29 puntos ingon man si DeAndre Jordan nga milangkat og 15 ka rebounds sa Clippers.

Ang sentrong si Rudy Gobert dunay 26 puntos ug 14 ka rebounds sa Jazz nga napilde sa Clippers sa ikatulong higayon sa upat ka duwa nila karong season ug ika-18 sa katapusan nilang 20 ka panag-abot. Hinoon sa baraha nilang 44-29 ang Jazz sud na sab sa playoffs ug dakog posibilidad nga sila na sab sa Clippers ang magtige sa unang hugna.

Didto sa American Airlines Center,  ang Raptors mipanso na sab og playoff  ticket human gitumba ang Dallas Mavericks, 94-86, victory over the Dallas Mavericks.

Sila si DeMar DeRozan ug Serge Ibaka dunay 18 puntos matag usa sa Raptors nga mikadlit sa ika-44 nilang daog karong season.

Sa laing aksiyon, si John Wall mipabuto og 37 puntos sa dihang gipiog sa Washington Wizards si LeBron James ug ang Cleveland Cavaliers, 127-115, aron pagpasikit og maayo sa karera alang sa nag-unang puwesto sa Eastern Conference.

Ang Wizards alkansi na lang karon og duha ka duwa sa Boston Celtics ug duha ug tunga ka duwa sa NBA champion Cavaliers alang sa unang dapit sa East.

Si Bradley Beal miamot og 27 puntos sa Wizards, nga dunay 19-7 record kun ugaling ang ilang lima ka starters makaposte og double figures.

Bisan og nayayay ang iyang mata, si James miwadwad gihapon og maayo aron pagpuntos og 24 uban ang 11 ka rebounds ug walo ka assists apan nakawang ang iyang paningkamot sa habig sa Cavs. – EBV (BANAT NEWS)