Magis Eagles nakabawos

CEBU, Philippines - Ang six-time champion Sacred Heart School-Ateneo de Cebu Magis Eagles naka-angkon pa og laing kinabuhi human miresbak batok sa University of the Visayas Baby Lancers, 65-63, sa Game 2 sa best-of-three SM National Basketball Training Center (NBTC) League Cebu division finals kagahapon didto sa Minglanilla Sports Complex.

Ang duha ka koponan parehong gibati og kalagsik nga moduwa taliwala sa abiba sa dul-an sa 2,000 ka fans gikan sa Sisters of Mary School-Boystown apan ang kalapad nga kastinatian sa kampiyonato sa Ateneo, nga inabagan pa sa krusyal nga mga sipyat sa Baby Lancers, maoy mipatigbabaw sa kinauwahian.

Nagdanga-danga na pud unta sila sa kapildihan sa dihang ang Baby Lancers madasigon nga mibangon human malubong og 12 puntos dayon nga ngadto sa pag-ilog sa labaw, 61-58, sa nahibiling kuwatro minutos apan ang Magis Eagles mibawos og labok gamit ang 7-0 run nga giduslitan nilang Eroll Pastor, Christian Manaytay ug Patrick Yu nga maoy nakapalabaw nila og balik, 65-61, sa nahbiling 2:33 sa duwa.

 Katpusan nakasikit ang Baby Lancers sa iskor nga 63-65 sa itsa ni Joshua Yerro sa nahibilin nga 2:02 gumikan kay ang duha ka protagonista nagsinukliay na man og mga sipyat sa nahibling bahin sa duwa.

 Human wa masud ang running jumper ni Yu sa nahibiling siyete segundos, duna pa unta higayon ang Baby Lancers nga modaog o dili ba kaha ihatud ang duwa sa overtime apan si Jimpaul Amistoso, nga wala seguro masayud sa oras, mi-dribol og maayo sa bola hangtud nga iya kining nabuhian sa halfcourt dayong kapupos sa oras nga gikadismaya sa ilang bench.

 Si Pastor maoy nangu sa balanseng ataki sa Ateneo uban sa iyang 11 puntos, samtang si Yu, Andrew Velasco ug Jemery Nacua dunay nuybe puntos matag usa.

 Nangu sa Baby Lancers si Jancork Cabahug bitbit ang 18 puntos. Si Justin Jake Rosete mitali og 16 apan unom lamang ka players asa UV ang naka-iskor hinungdan sa ilang pagkahagba.

 Ang Baby Lancers ug Magis Eagles magtiwas sa tinaktakay nga Game 3 karong Pebrero 4 didto sa Hoopsdome sa dakbayan sa Lapu-Lapu. (BANAT NEWS)