Team Rama Hari Sa Power Forty 50-Above

CEBU, Philippines - Nagmangtas og maayo si Al Misa, kinsa mipabuhagay og 38 puntos aron pangulohan ang team Rama nga mipukan sa Edgar ‘N Tony, 90-86 ug aron sab maangkon ang titulo sa Power Forty Ballclub 50-Above First Conference basketball tournament niadtong Martes didto sa Inayawan Sports Complex.

Sa pasiunang duwa, ang team Atillo mipilde sa team Yosores, 92-83 aron sab mopahiluna sa ikatulong puwesto.

Daku sab og natampo sa kadaugan sa team Rama silang Michael Arias ug None Sabandeja nga parehong miamot og 21 puntos.

Gawas sa puntos, si Sabandeja nakatabang sab og daku sa depensa ilabi na sa fourth quarter diin iyang napugngan ang mga tirador sa Edgar ‘N Tony.

Human moposte og 27-19 sa first period, ang team Rama miaksiyon og takilid sa nagsunod nga duha ka kuwarter, hinuon nakarekober sa final period ug natugkad nila ang tungason nga kadaugan.

Si None Carbonilla mikadlit og 23 puntos aron mangu sa Edgar ‘N Tony. Sila si Ricky Dayondon ug Eric Chiong mitimbre’g 17 puntos matag usa, samtang si Noel Flordiliza mitampo’g 13 puntos sa Edgar ‘N Tony.

Sa laing bahin, si Jun Abapo mitali og 31 puntos aron mangu sa tanang scorers sa team Atillo.  Miiskor sab og double figures sila si Teody Ebrado, Tony Ungria ug Sammy Atillo.

Ang team Yosores gipangulohan sab ni Atty. Flor Yosores nga miburak og 26 puntos. Sila si Hermes Abasolo, Roel Traya, Simoy Yosores ug Eman Navares  nakaiskor sab og double digits sa pilderong koponan.

Nagmalampuson ug mabulokon ang maong liga tungod sa pagtinabangay sa mga team managers nga naglakip nila ni Atty. Flor Yosores  (Yosores), Sammy Atillo (Atillo), Romy Rama (Rama), Vez Eleguin (Eleguin), Bob Samson ug Chino Kalinga (Bob ‘N  Chino) ug nilang Edgar Nacario ug Tony Navares (Edgar ‘N Tony).

Ang liga gipadagan ni El Presidente Dome Labalan ug Vez Eleguin sa abag ni commissioner Edwin Dejacto Sr.

Puntos Matag Usa

Unang duwa:

ATILLO (92) – Abapo 31, Ebrado 24, Ungria 23, Atillo 10, Pestaño 4.

YOSORES (83) – F. Yosores 26, Abasolo 16, Traya 15, S. Yosores 14, Navares 12.

Ikaduhang duwa:

RAMA  (90) – Misa 38, Arias 21, Sabandeja 21, R. Rama 6, Mosqueda 4.

EDGAR ‘N TONY (86) – Carbonilla 23, Dayondon 17, Chiong 17, Flordiliza 13, Sandal 9, Villaner 7. – BANAT NEWS