Labing unang higayon

CEBU, Philippines - Si Kevin Durant mikadlit sa labing una niyang triple-double uban sa Golden State Warriors human siya mihipos og 19 puntos, 11 ka rebounds ug 10 ka assists sa 108-99 nilang kadaugan batok sa Dallas Mavericks sa NBA kagahapon  didto sa Oracle Arena sa Oakland, California.

Apan si Klay Thompson maoy nangulo sa Warriors nga miposa og 17 sa iyang 29 puntos sa ikatulong kuwarter,  samtang si Stephen Curry miamot og 14 puntos sa Warriors.

Wala sab magpabitin si Draymond Green nga dunay 13 puntos, walo ka rebounds ug pito ka assists alang sa Warriors nga mitali sa ikasiyam nilang sunod-sunod nga daog batok sa Mavs didto sa ilang balwarte.

Sa lain pang mga aksiyon, si Isaiah Thomas mikadlit og 29 sa iyang career-high 52 puntos sa ikaupat nga kuwarter aron pagkulit og club record alang sa labing daghang puntos sa usa ka kuwarter sa 117-114 nga kadaugan sa Boston Celtics batok sa Miami Heat, samtang si James Harden mipugnit og triple-double uban sa iyang 30 puntos, 13 ka rebounds ug 10 ka assists nga maoy mitimon sa Houston Rockets ngadto sa 140-116 nga demolisyon sa LA Clippers.

Misalida sab sila si Danny Green ug Tony Parker nga dunay 18 puntos matag usa sa dihang gilampurnas sa San Antonio Spurs ang Portland TrailBlazers, 110-94.

Si Ersan Ilyasova mirehistro sa iyang  career-high 23 puntos ug 13 ka rebounds sa Philadelphia 76ers nga  nakaipsot sa Denver Nuggets, 124-122.

Sa uban pang mga resulta, ang New Orleans Pelicans mipakaging sa New York Knicks, 104-92  ubos sa 23 puntos ug 18 ka rebounds ni Anthony Davis, ang Minnesota Timberwolves mitumba  sa Milwaukee Bucks, 116-99, ang Washington Wizards mikunis-kunis sa Brooklyn Nets, 119-95, ang Indiana Pacers  miihaw   sa Chicago Bulls, 111-101, samtang ang Atlanta Hawks midagit sa Detroit Pistons, 105-98.