Hidilyn Diaz ania sa Cebu

CEBU, Philippines - Inspirado sa naglagiting nga kalampusan nga iyang natagamtaman sa  milabay’ng Rio Olympics, si Pinay lifter Hidilyn Diaz misaad nga mohatag og daghan pang dungog sa nasud diin ang pagtunol sa Pilipinas sa labing una niining Olympic gold medal maoy nag-una sa iyang huna-huna.

“I didn’t expect the amount of attention that the Filipinos are giving me, but I am happy because I am able to inspire others especially the young ones,” matud pa ni Diaz nga ania karon sa Sugbo isip usa sa mga dinapit nga mamumulong sa  “The Process of Building Olympians” nga gipasiugdahan sa Epic

Performance Fitness ni Pio Gerardo Solon diha sa City Sports Club ugmang adlawa.

Ang 25-anyos nga Zamboageña mihimo og kasaysayan isip labing unang Pinay’ng atleta nga naka-medalya sa prestihiyosong Olympics. Nakapugnit siya og silver sa women’s 53kg. weightlifting event didto sa Rio aron paghatag sa Pilipinas sa labing una  Olympic medal sud sa 20 ka tuig.

Gawas sa kadungganan nga iyang naangkon, nahakop sab og bahandi  si Diaz, apil na niini ang P5 million gikan sa Philippine Sports Commission, P2 million gikan ni Presidente Rodrigo Duterte ug wala gibutyag nga kantidad gikan ni Pinoy ring superstar Manny Pacquiao. Wala pa’y  labot sa house and lot gikan sa Deca Homes ug libreng flights gikan sa AirAsia sa bisan asang destinasyon sa nagkadaiyang dapit sa kalibotan sud sa lima ka tuig.

Sayod hinuon si Diaz nga daku nga   responsibilidad ang iyang gihuptan. Mao kana ang hinungdan nganong mobalik dayon siya og training aron mangandam sa sunod niyang misyon, ang pagkabkab og bulawan sa International Weightlifting Federation (IWF) World Championships sunod tuig didto sa Penang,  Malaysia.

Mipadayag sab si Diaz sa iyang interes nga morepresentar og balik sa Pilipinas sa Southeast

Asian Games unya sa Agosto 2017 didto gihapon sa Malaysia. Kay nakamina og silver sa Rio, si Diaz nasayod nga taas ang pagdahum kaniya nga makalabni na og gold human naka-silver lamang siya sa 2011 ug 2013 SEA Games.

Kun ugaling maayo ang iyang salida sa maong duha ka international events, seguradong makahatag kini ni Diaz og igong kadasig aron kab-uton ang iyang damgo nga dakpon ang Olympic gold nga dugay na kaayong idlas sa mga kamot sa Pilipinas unya sa 2020 Tokyo Summer Games. (BANAT PALARO)