UV, SHS-Ateneo 2-0 na sa Batang PBA

CEBU, Philippines - Ang University of the Visayas ug Sacred Heart School-Ateneo de Cebu mikulit sa ikaduha nilang sunod-sunod nga daog sa nagpadayung Cebu leg sa Cloudfone Batang PBA Cebu leg niadtong miaging adlaw didto sa Magis Eagle Arena.

Ang UV mipahamtang og ikaduhang pilde sa Abellana National School, 86-76, samtang ang SHS-AdC mipaluhod sa University of Southern Philippines Foundation, 69-60.

Midaog ang UV bisan pa sa pagbuto sa opensa ni Breidyn Smith sa ANS nga miiskor og 34 puntos. Ang UV milabaw 41-34 sa unang duha ka kuwarter sa wala pa mibiya sa second period, 69-57. Si Osias Padilla maoy nangu sa UV sa iyang 16 puntos, samtang si Joshua Canoy ug Froiland Maglasang mitampo og 14 matag usa.

Sa ilang bahin, ang Magis Eagles nag-agi pa og kulba batok sa USPF dihang nagtabla ang iskor 54-all sa sayung bahin sa final period. Sa hiniusang paningkamot nila ni Maynar Uy, Chico Chan, John Aguilar ug Josh Fuentebella, ang SHS-AdC nakahimo pagposte og komportableng labaw 65-57 sa katapusang dos minutos sa duwa.

Sa laing duwa, ang University of San Carlos miangkon sa una nilang daog sa torneyo human nila gipilde ang Don Bosco Technical College, Inc., 64-61. (BANAT NEWS)