UV lancers sud na sa top 4

CEBU, Philippines - Gibingat sa University of the Visayas (UV) Green Lancers ang nagkadina nilang daog pinaagi sa paglubong sa University of Cebu (UC) Webmasters, 89-69 sa 1st Capt. Raul Cabanero Inter-collegiate Basketball League niadtong Martes sa gabii didto sa Bulacao Sports Complex, Talisay City.

Ang kabugnaw sa kagabhion  dili babag sa laraw sa UV pagsud sa top 4 ug ingon man madepensahan ang ilang limpiyong baraha, 4-0.

Si Michael Angelo Macion mao lang  ang nakaiskor og double figures alang sa UV sa iyang 28 puntos, apan gialalayan   siya og maayo sa iyang kaubanan.

Gumikan niini, ang UV segurado na nga mamahimong no. 1 human sa eliminasyon bisan pa og mapilde sila sa katapusan nilang duwa batok sa University of Southern Philippines Foundation (USPF) Panthers karong gabii.

Ang UC nga hingpit nang nanamilit sa torneyo bitbit ang 0-5 nga baraha, gipangulohan nilang Filvenson Culango ug Justine Dacalos sa ilang 20 ug 18 puntos matag usa.

Sa laing duwa, ang Sitio  Hawod midaog batok sa South Central, 60-53 sa Inter-sitio division.

Ang maong liga  gipasiugdahan ni Bulacao  Brgy. Capt. ug Talisay City ABC president Raul Cabanero.  Gisuportahan sab kini sa Bulacao Barangay Council ug sa SK Task. Ang mga duwa gipadagan  nilang konsehal Banjo Abastillas, Darwin Cabanero ug Agnes Lastimosa, ingon man sa CEBRA nga gipangulohan ni CESAFI  head referee Edwin Dejacto Sr.

Puntos matag usa

Unang duwa:

SITIO HAWOD (60) – Unabia 15, Abordo 10, Cabellon 6, Patiba 6, Ybañez 5, Cabriana 4, Guiao 4, Teano 4, Bacus 3.

SOUTH CENTRAL (53) – Mabalco 16, Cabanero 12, Abalo 12, Bacus 6, Cabellon 5, Cabriana 2, Abellana 2.

Ikaduhang duwa:

UV (89) – Macion 28, Balabag 9, Napao 8, Santillan 6, Gahi 6, Segumpan 6, Suerte 6, Maestre 6, Aguirre 4, Soliva 2, Manzo 2, Bolanio 2, Langahin 2.

UC (69) – Culango 20, Dacalos 18, Villarba 9, Delator 6, Codilla 5, Suelto 4, Mayol 4, Tagudin 2. (BANAT NEWS)