UV Green Lancers pabiling wa’y pilde sa 1st Capt. Raul Cabanero Cagefest

CEBU, Philippines - Ang haring gangis nga University of the Visayas (UV) Green Lancers mikulit sa ilang ikatulong sunod-sunod nga daog pinaagi sa pagpilde sa J. Espina Wildcats, 87-77 sa nagkainit nga aksiyon sa 1st Capt. Raul Cabanero Inter-collegiate Basketball League niadtong Huwebes sa gabii didto sa Bulacao Sports Complex sa Talisay City.

Ang UV Lancers kasamtangang nag-una sa standing sa ilang 3-0 record ning maong torneyo nga namugna pinaagi sa paningkamot ni Bulacao Brgy. Capt. Raul  Cabanero, kinsa mao sab ang ABC president sa dakbayan sa Talisay.  

Turno na sab ni Rey Suerte pagpangulo sa UV Lancers human siya miiskor og 18 puntos.  Mihimo sab og double figures si Leonard Santillan sa iyang 14 puntos, si Jun Kent Manzo III mikadlit og 11 puntos ug si Michael Angelo Macion mipaksit og 10 puntos alang sa UV nga maoy nidominar sa kinatibuk-ang duwa.

Nausik ang 30 puntos ni Joshua Dela Cerna  kay nakatilaw ang  J. Espina Wildcats sa labing una nilang pilde. Sila si Jose Dimco ug John Lucena nagkumboya’g 23 puntos alang sa 1-1 nga J. Espina.

Ang mga duwa gipadagan ni league commissioner nga si konsehal Banjo Abastillas sa abag nilang councilors Darwin Cabanero ug Agnes Lastimosa. Ang liga gisuportahan sab sa Bulacao Barangay Council ug sa SK Task Force.

Miabag sab sa pagpadagan sa duwa mao ang Cebu Basketball Referee Association (CEBRA) sa pagpangulo ni Edwin Dejacto Sr.

Puntos matag usa

Unang duwa:

(Inter-sitio)

Lower Kabanayan (90) – Nayne 26, Gulfan 16, Flores 11, Tanilon 10, Rosagenia 10, Cabellon 8, Linsangan 4, Sadora 2.

South Gate (83) – Timogtimog 21, Perpetua 15, Baet 13, Abellana 12, Uy 11, Padica 6, Fernandez 2.

Ikaduhang duwa:

(Inter-collegiate)

UV (87) – Suerte 18, Santillan 14, Manzo 11, Macion 10, Balabag 8, Gahi 7, Soliva 6, Segumpan 5, Napao 4, Bolano 3.

J. ESPINA (77) – Dela Cerna 30, Dimco 13, Lucena 10, Sanchez 9, Pono 5, Mumar 5, Kong 3. (BANAT NEWS)