GM Mac mi-tour sa Europe

CEBU, Philippines – Kapin sa duha ka buwan nga mipahigayon og European tour si Cacoy Doce Pares World Eskrima Federation training director Grandmaster John Mac aron palamboon ang natad sa eskrima didto sa maong dapit diin mihimo siya'g mga eskrima seminars ug demonstrations atubangan sa mga tinun-an ni Supreme Grand Master Ciriaco "Cacoy" Cañete didto sa lain-laing eskrima clubs sa Europe.

Ang unang dapit sa Europe nga gibisitahan ni Mac mao ang Berlin,Germany kaniadtong Oktubre 8 diin didto ipahigayon ang seminar sa Ringside Gym Berlin, Gürtelstraße 25, 10247 Berlin, Germany nga gitambongan og walo ka eskrimadors ug maoy host si Marcus Brosch sa Cacoy Doce Pares Berlin Chapter.

Mibalhin si Mac didto sa Sporthalle sa Bildungszentrum sa Markdorf, Germany kaniadtong Oktubre 17 diin maoy host si Clemens Milich sa Cacoy Doce Pares JSV Markdorf  nga gitambungan og pito ka eskrimadors.

Niadtong Nobiyembre 8-9, didto si Mac sa Oslo Norway diin upat ka oras nga gihimo ang seminar gikan sa alas kuwatro sa hapon ngadto na sa alas otso sa gabii nga gipasiugdahn ni Master Danny Huertas sa Doce Pares Evaluation nga gitambongan og walo ka eskrimadors.

Nianang pagka Nobiyembre 15, mibalik na sab didto sa Germany si Mac apan niining higayona, didto na ipahigayon ang seminar sa Schwerin,Germany diin maoy host si GM Uwe Claussen sa International Martial arts Schwerin nga gitambongan og 16 ka eskrimadors.

Dugang 16 ka eskrimadors ang misalmot sa seminar didto sa Braunschweig, Germany-Hotel Arcadia(Halle 1) niadtong Nobiyembre 19 sa Donnerstag, Den, IMB Braunschweig, Salzdahlumer Street 137 diin maoy host si Sifu Bjoern Hammerling sa International Martial Arts Boxing Academy.

Nianang pagka Nobiyembre 21-22, didto si Mac sa Idar Oberstein,Germany  sa Weierbacherstr 91,55743 Idar Oberstein nga gipasiugdahan ni GM Visayo 'Jojo' Balinado sa Balinado Balintawak  Eskrima nga gisalmotan og unom ka eskrimadors.

Niadtong Nobiyembre 28, mitapon si Mac didto sa dakbayan sa Malaga, Spain diin didto ipahigayon ang seminar sa Academia Fluxus nga gipasiugdahan ni Jose Diaz Jimenez  sa Orihinal Eskrima and Eskrido nga gisalmotan og 13 ka eskrimadors.

Niadtong Disyembre 12, didto sa Rzeszow,Poland mipahigayon og seminar si Mac nga gipasiugdahan ni Michal Szczesny sa Cacoy Doce Pares Poland Chapter nga gitambongan og 10 ka eskrimadors.

Mipauli si Mac balik dinhi sa Pilipinas niadtong Disyembre 20 ug didto siya manukad sa Berlin Tegel Airport. (BANAT NEWS)