Doce Pares 84th anniversary

Himoon karong Enero 9, adlaw'ng Sabado ang ika-84 nga anibersaryo sa Doce Pares, ang nailhan nga labing karaan ug usa sa labing bantugan nga eskrima club dinhi sa Sugbo ug sa tibuok Pilipinas.

Ang Doce Pares gitukod niadtong tuig 1932 sa mga managsoong Cañete pinangulohan ni Eulogio "Yoling" Cañete kinsa mipanaw na sa laing kalibotan sulod sa taud-taud nang panahon ug gipadayon kini pagdumala sa uban niyang mga igsoon diin maoy gihimong "president for life" ang 96 anyos nga Supreme Grand Master nga si  Ciriaco "Noy Cacoy" Cañete.

Niadtong Disyembre 30 atol sa ilang tinuig nga eleksiyon, gilugwayan sa laing tuig ang termino ni SGM Cacoy.

Naandan na sa Doce Pares nga matag anibersaryo, adunay mga langyaw nga motambong aron mohatag og diotay'ng bulok sa selebrasyon.

Matag tuig sab, mohimo'g demonstrasyon ang mga sakop sa Doce Pares ilabi na ang mga grandmasters nga mga anak ug mga apo ni Cacoy. Pipila kanila mao ang iyang anak babaye nga si Bernadette C. Tormis, apo ni Chick Cañete ug laing apo nga si Mico Cañete.

Ug dayag na lang, sa usa ka dakong okasyon, dili sab mawagtang ang usa ka salo-salo nga pagasi-unhan sa balaang misa ug samtang nanihapon ang mga bisita, adunay motukar nga banda tungod kay ang mga Cañete dili lang mga eskrimador apan kaliwat sab og musikero ilabi na kadto si Edgar Cañete nga mipanaw na sab ug ang iyang manghud nga si Glenn.

Tungod kay daghang bisita si Cacoy nga mahiligon sa awit, dili magdugay ang banda tungod kay magtiwas man sa karaoke.

DILI GYUD MABANGBANG? Niadtong Disyembre 28 dihang nanihapon kami didto sa City sports club sa Ayala ubos sa pagdapit ni Lorenzo "Chao" Sy, ang commissioner sa Cebu City Sports Commission uban ni Atty. Baldomero C. Estenzo ug sportscaster Bobby Inoferio, ila akong gikataw-an ug gisupak sa akong panagna nga dunay duha ka teams sa Western Conference nga may katakos nga mopukan sa Golden State Warriors ug kini way lain ang San Antonio Spurs ug ang Oklahoma City Thunder.

Sa East , ang mga teams nga posibleng mopukan sa Warriors mao ang Cleveland, Miami, Indiana ug Washington ug bisan gani si PBA star Greg Slaughter misanong sa akong pangagpas.

Nagkita kami ni Slaughter kagahapon didto sa Villa Zacate nga usa ka sementadong korte diin nagduwa og usa ka exhibition game ang Team Rama batok sa Team Mike diin midaog ang Team Rama pinangulohan sa manghud ni Mayor Mike Rama nga si kanhi Customs Police Jing-jing Rama. Human sa duwa, nagkukabildo kami sa makadiyot ni Slaughter.

Hugot akong pagtuo nga modaug ang Spurs dili man tingali sulod sa upat ka higayon apan maisogon akong mobarug nga sila maoy labing lig-on nga team nga mobaraw sa Warriors.

Isip usa ka tactician dili lang sa basketball court apan sa iyang pagka US Navy reserve, ang tanang diskarte sa pagdaog anaa kang coach Gregg Popovich lakip na ang paghakot sa mga maayong laking players.

Kini tungod kay anaa kanila ang big Three nga silang Tim Duncan, Manu Ginobili ug Tony Parker, duna pa gyu'd sila'y Kawhi Leonard, Danny Green ug Borris Diaw ug karon naa sab kanila si LaMarcus Aldridge ug si David West.

Kinsa man kuno'y dili motuo nga mapilde ang Warriors kung kining obserbasyon maoy atong kuhaan og sumbanan. Mahimong modaug ang Spurs bisan ug dili moduwa ang Big Three apan usa lang ka adlaw wala moduwa si Stephen Curry, napilde ang Warriors sa Dallas ug kagahapon diriyot pa gyud sila mapilde sa Denver Nuggets sa overtime.

Tilimad-on kini nga kung magbagat na ang Spurs ug Warriors, dila ray way labod sa Warriors.Pareho sab ni silang walay pilde sa ilang homecourt. Dili madugay, naa na gyud mapilde tali nilang duha.

Gani andam na akong mopusta. Gamay lang ug kontaka lang ko ninyo sa email o sa 0906-493-0492.