Saludar moaway karon sa Japan

CEBU, Philippines – Si Vic ‘Vicious’ Saludar magsagubang dayon og malisud nga hagit sa labing una niyang away ubos sa ALA Gym gumikan kay iyang hagiton ang Hapon nga kampiyon nga si Kosei Tanaka alang sa WBO minimumweight title karong adlawa didto sa Aichi Prefectural Gym sa Nagoya,  Japan.

Matud pa ni Saludar nga dakung dungog kaniya ang moaway sa nabaniog na nga boxing stable sa kalibotan ug iyang buhaton kutob sa iyang mahimo nga molampos sa giisip niyang labing mahinungdanong away sa iyang karera ug sa ingon mamahimo siyang ikaduha nga world champion sa ALA sunod ni Donnie ‘Ahas’ Nietes, ang kasamtangang hari sa WBO light flyweight division.

"Ito na po ang pinaka importanteng fight ko sa career ko, kasi ito ang dream ko at dahilan kung bakit nag pro ako. Gusto ko po maging world champion. Pagsisikapan ko'ng mabigyan ng karangalan ang bayan ko dahil napakalaking bagay po kung manalo ako at ma-represent ang Pilipinas at maging pangalawang world champion ng ALA Promotions,” matud pa ni Saludar.

Human mapilde sa unang higayon kay miretiro siya sa ikaupat nga hugna gumikan sa injury sa iyang kamot sa iyang away batok ni Powell Balaba duha ka tuig ang milabay didto sa Cagayan de Oro City, si Saludar miiskor og walo ka sunod-sunod nga daog, unom niini pinaagi sa knockout.

Gihulagway ni Saludar nga hinay og kumo si Tanaka, apan dili gihapon siya mokompiyansa gumikan kay dili kini ma-world champion kun wala kini ikabuga.

Kun unsa man gani ang resulta, si Saludar malaumon nga ang kasinatian nga iyang makuha sa pag-away niya og world title sa labing unang higayon makatabang og daku aron mamahimo siyang mas maayo nga boksidor.

“Malaking chance po ito para sa akin. Sa career ng boxing, hindi lahat nabibigyan ng pagkakataon na makipaglaban para sa isang world title. Alam ko magiging mas mabuti akong boxer pagkatapos ng experience na ito,” dugang pa ni Saludar. (BANAT NEWS)