P300T gitagana alang sa 2016 CCM
CEBU, Philippines – Seguradong mabuhong gyud ang mga mananaog kun premyo maoy hisgutan sa mga lumba sa dagan sunod tuig.
Kini kay gawas sa SM 2 SM Run nga mitagana og tunga sa milyon ka pesos alang sa mga top finishers, ang organizers sa Cebu City Marathon 2016 nga gikatakda karong Enero 10 didto sa IT Park migahin sab og kapin sa P300,000 nga ganti ngadto sa mga manghawod sa kompetisyon.
Ang makampiyon sa open division mobulsa og P35,000, samtang ang mopatong sa ikaduha ug modawat og P30,000 ug ang ikatulo madawat og P25,000.
Sa local category, ang top 3 moangkon og P20,000, P15,000 ug P10,000.
Ang full marathon lamang maoy gibahin sa duha ka division nga mao ang open ug local.
Sa 21K, ang nag-unang tulo ka mananaog modawat og P10,000, P7,000 ug P5,000, samtang P3,000, P2,000 ug P1,000 ang madaog alang sa top three performers sa 3K.
Niadtong interesadong mosalmot, mahimo pang magpalista hangtod karong Disyembre 20. Kadtong nakaparehistro na mahimo nang mokuha sa ilang race kits sa Enero 6-9 diha sa Ayala Center Cebu-Active Zone.
- Latest
- Trending
