Donaire world champion na sab

CEBU, Philippines – Nakuha pagbalik ni Nonito ‘The Filipino Flash’ Donaire Jr. ang iyang WBO super bantamweight title human gipilde ang Mehikanong si Cesar Juarez pinaagi sa ‘unanimous decision’ sa brutal ug puno sa aksiyon nga kumbati nga milanat og 12 ka hugna   kagahapon didto sa   San Juan, Puerto Rico.

Ang garbo sa mga Pinoy maoy nikontrolar sa sayong bahin sa away diin gitumba niini si Juarez sa makaduha ka higayon sa ikaupat nga hugna ginamit ang mahait niyang left hooks.

Apan si Juarez nakabawi sa tunga-tungang bahin sa ilang engkuwentro diin iyang gidabodabohan ang 33-anyos nga si Donaire, nga tataw kaayong mibahar sa ikapitong hugna diin kini nahiagum og gisi ug bun-og sa iyang mata.

Pabiling nanginit si Juarez ug hapit pa gani niini mapatukay-ang si Donaire sa ika-10 nga hugna. Padayon nga nagsinukliay sa mabangis nilang kumo ang duha ka boksidor hangtod sa nahabiling duha ka hugna nga nakalingaw og maayo sa mga nanan-aw.

Dihang mikalma na ang unos, si Donaire maoy mipatigbabaw sa scorecards sa tulo ka mga judges, 116-110, 116-110 ug 117-109.

Human sa impresibo niyang kadaugan sa lagmit maoy ilhong “Fight of the Year”, si Donaire wala magpanuko  sa pagsulti nga andam siya nga hatagan og ‘rematch’ si Juarez.

Gidawat ni Juarez nga pilde siya, apan wala siya mahimuot sa iskor sa mga hurado kay alang kaniya sikit kaayo unta ang resulta.

Si Donaire nagbitbit na karon og 36-3 record uban ang 23KOs, samtang si Juarez nakatilaw sa ikaupat pa lamang niining pilde sa 21 ka away uban ang 13KOs.

Ang korona nga nadaog ni Donaire batok ni Juarez kanhi niya gihuptan, apan nailog kini ni Guillermo Rigondeaux duha na ka tuig ang milabay.

Mao sab kini ang ikatulong sunod-sunod nga daog sa five-division world champion human siya makatilaw og makalisang nga kapildihan pinaagi sa 6th round knockout ngadto ni Jamaican star Nicholas Walsters niadtong Oktubre 2014. (BANAT NEWS)