UV Lancers abante sa PCCL elite eight
CEBU, Philippines - Gilat-an sa University of the Visayas (UV) Green Lancers ang karibal nilang University of Negros Occidental-Recoletos (UNO-R) Rams sa Bacolod City, 76-47 aron maghari sa Visayas eliminations ug sa Vis-Min Zonal sa Philipine Collegiate Champions League (PCCL) sa miaging gabii didto sa Ormoc Superdome sa dakbayan sa Ormoc.
Gumikan niini, ang UV Green Lancers ni coach Gary Cortes miabante sa PCCL Elite Eight diin aduna sila’y kahigayonan nga mobawos ngadto sa ilang karibal sa Cebu Schools Athletic Foundation, Inc. (CESAFI) University of San Carlos (USC) Warriorsug ingon man mohagit sa mga lig-ong koponan gikan sa Manila nga gipangulohan sa Far Eastern University (FEU) Tamaraws sa UAAP ug sa Letran Knights sa NCAA.
Ang UV Green Lancers gikatakdang molarga paingon sa Manila karong Domingo alang sa PCCL games nga adto ipahigayon sa San Juan Arena.
Sa dili pa sila mangambisyon nga mobawos sa Warriors, kinahanglan unang modaog ang UV Lancers batok sa National University, San Beda ug sa University of Sto. Tomas.
Si Steve Cedrick Akomo maoy nangu sa UV Lancers sa iyang 16 puntos, lakip ang tulo ka dunks.
Silang Leonard Santillan ug Arvie Cabanero miamot og 15 ug 10 puntos matag usa alang sa UV Lancers.
Gipangulohan sab ni Japeth Claridad ang Rams pinaagi sa iyang 14 puntos, gisundan ni Kent Bryan Dimaranan nga adunay 13 puntos.
Sa gubat alang sa ikatulong dapit, ang University of San Jose- Recoletos (USJ-R) Jaguars miunay og pilde sa igsuon nilang koponan Holy Trinity College (HTC) Wildcats sa General Santos City sa iskor nga 71-76.
Si Kevin Villafranca mibahog og 15 puntos aron mangu sa Jaguars, samtang si Leomark Salas miposa’g 18 puntos alang sa Wildcats, si Ever Joy Dialogo miamot og 16 puntos ug si Joseph Diamante adunay 11 puntos. (BANAT PALARO)
- Latest
