Warriors miinat sa ilang best record, 22-0

CEBU, Philippines – Mitala sa ilang ika-22   ka sunod-sunod nga daog ang defending champion Golden State Warriors human ilang gitabastabas ang Brooklyn Nets, 114-98 sa nagpadayong aksiyon sa National Basketball Association kagahapon didto sa Madison Square Garden sa New York City.

Si Stephen Curry miposa’g 28 puntos, 16 niini nahimo atol sa third period aron pangulohan ang Warriors nga miinat sa ilang best record start ngadto sa 22-0.

Mipakita sab og maayong labok si Draymond Green, kinsa mikunis-kunis og 22 puntos uban ang siyam ka rebounds ug pito ka assists.

Miamot sab og 21 puntos si Klay Thompson alang sa Warriors, kansang sagunson nga daog sa regular season milanat na ngadto sa  26 ug usa na lang ang biya sa 2012-2013 Miami Heat alang sa ikaduhang labing taas nga streak sa kasaysayan sa NBA.

Gikan sa iyang 40-point game, wala una mangigo si Curry sa sayong bahin sa duwa diin katingad-an kaayo nga misipyat siya sa unang tulo niya ka free throws sa wala pa siya manginit aron tabangan ang Warriors nga kontrolahon ang duwa batok sa Nets.

Kahinumduman, ang Warriors diriyot mapilde sa Nets atol sa ilang duwa didto sa Oracle Arena.

Si Thaddeus Young maoy nangu sa Brooklyn nga mipabuhagay og 25 puntos ug milangkat og 14 ka rebounds.

Sunod kontrahon sa Warriors mao ang Indiana Pacers ugmang adlawa  ug posibleng mahimo na nilang tablahon ang streak sa Heat nga 27 ka higayon.

Sa laing mga duwa,  ang Oklahoma City Thunder nakaipsot batok sa Sacramento Kings, 98-95 diin si Kevin Durant maoy nagsalbar kanila pinaagi sa iyang   jumpshot.

Si Durant maoy nangu sa Thunder sa iyang 20 puntos, samtang  20 puntos sab ang nahimo ni Rudy Gay aron pangulohan ang Kings.

Gilubong sa Detroit Pistons ang Los Angeles Lakers, 111-91,  ang  Dallas Mavericks midaog batok sa Washington Wizards, 116-104 diin wala makatiwas og duwa si John Wall tungod sa piang.

Nakaipsot ang Memphis Grizzlies batok sa Phoenix Suns, 95-93 pinaagi sa winning basket ni Courtney Lee, apan si Marc Gasol maoy nangu sa kadaugan sa iyang 22 puntos.         Si Eric Bledsoe maoy nangu sa Suns nga adunay 23 puntos. (BANAT NEWS)