Team Aspa nakaipsot sa Cyrus
CEBU, Philippines - Nagkumboya og 25 puntos sila Jimboy Feloteo ug Rex Jomuad aron giyahan ang Aspa nga makaipsot batok sa Cyrus, 64-63 sa kulbahinam nilang duwa sa Dayon Christmas League 2015 basketball tournament niadtong Lunes didto sa Sacred Heart School old campus gym sa Gen. Maxilom Ave., Cebu City.
Si Feloteo miiskor og 14 puntos, samtang si Jomuad miambit og 11 puntos alang sa sikit kaayo nga kadaugan.
Nausik ang 22 puntos ni Rafael Oliver kay wala kini makapadaog sa Cyrus ni team owner JR Sta. Rita. Si Sta. Rita, kinsa miiskor og 13 puntos sa miaging duwa, nakahimo lang og dos puntos, si Jepo Abella mitampo’g 11 puntos ug si Gerry Molina adunay 10 puntos.
Midaog sab ang Cebu Wetland Resort sa kulbahinam nga duwa batok sa Royal Majesty, 56-50 sa pagpangulo nilang Jun Cardeno ug Keken Cabahug sa ilang 12 ug 10 puntos.
Sa gilauman, si Christian Develleres mao na sab ang nangu sa Royal Majesty pinaagi sa iyang 15 puntos.
Sa laing duwa, midaog sab ang Boardwalk pinaagi sa forfeiture batok sa Bosston. (BANAT PALARO)
- Latest
