Cebu province misalida dayon

CEBU, Philippines – Ang garbo sa dakbayan sa Talisay nga si Raven Faith Alcoseba maoy mipainit sa kampanya sa Cebu Province human siya nakapasol og duha ka bulawang medalya sa swimming event sa Philippine National Youth Games-Batang Pinoy National Championships nga gisugdan kagahapon  didto sa Cebu City Sports Center (CCSC).

Si Alcoseba mitunol sa Cebu Province sa labing una niining gold sa 200m backstroke diin siya mirehistro sa labing paspas nga oras nga duha ka minutos ug 30.42 segundos. Gikaluhaan niya ang iyang bulawan human iyang gidominar ang 400m backstroke sa oras nga 4:50.19.

Si Rian Mario Tirol maoy milabni sa ikatulong bulawan sa Cebu Province human niya gidominar ang 50m breaststroke sa oras nga 32.52 segundos.

Ang host Team Cebu City igo lamang nakadaog og silver medal pinaagi ni Justine Reign Garrido sa 50m breaststroke nga gidaog ni Bela Louise Magtibay sa dakbayan sa Lucena  sa oras nga 36.38 segundos.

Human sa unang adlaw sa secondary swimming event, ang  Quezon City maoy misidlak og maayo bitbit ang pito ka gold ug tulo ka silver medals, gisundan kini sa Cebu Province nga dunay tulo ka golds ug Manila   sa ilang usa  ka gold ug tulo ka silvers.

Sa 12-under category, ang Iligan City maoy nag-una bitbit ang duha ka golds ug nagsunod ang Quezon City nga nakatangag og usa ka gold, tulo ka  silvers ug usa ka bronze.

Human sa bonggang seremonyas kagahapon ug ingon man pagsikad sa swimming, seryosong butang na ang atimanon sa mga atleta gumikan kay ang tanang mga duwa kumbatihan na man  karong adlawa. Banatan sa CCSC mao ang swimming, athletics, rugby football ug sepak takraw.  Lain pang mga binyu naglangkob sa MetroSports (badminton), Fort San Pedro   (beach volleyball), Cebu  Coliseum    (boxing), Don Bosco Technology Center (futsal), Cebu Sports   Institute   (hand ball ug cheerleading), DepEd-Cebu City Division office (chess), Gaisano Capital South (karatedo), CitiGreen Tennis Resort ug Alta Vista Golf and Country Club  (tennis ug  soft tennis), SM City-Cebu (taekwondo), Sacred Heart School old campus (volleyball) ug Cebu Provincial Capitol (table tennis ug dancesport).

Ang Mandaue maoy mopadagan sa arnis, weightlifting, wrestling ug pencak, samtang ang dakbayan sa Danao maoy mo-host sa duathlon, triathlon, basketball, cycling, ug softball.