Mga Kiwis nanghawod

CEBU, Philippines - Ang Sugbuanong si Josephine Teria malipayon kaayong miposing uban sa iyang tropeyo ug medalya human gidominar ang Women Figure 40-above category sa  makasaysayanong NABBA Universe World Championships 2015 niadtong Sabado sa gabii didto sa Mariners’ Court sa dakbayan sa Sugbu.

Ang mga tang-an nga bodybuilders sa New Zealand nga gipangulohan nilang Kurt Brunton ug Sarah Malthus misidlak og maayo, samtang ang Pinoy nga si Sandy Bontuyan sa Taguig City ug ingon man ang garbo sa Sugbu nga si Josephine Teria misidlak sab sa makasaysayanong NABBA Universe World Championships 2015 niadtong Sabado sa gabii didto sa Mariners’ Court sa dakbayan sa Sugbu.

Si Brunton, nga maoy nanghawod sa Athletic Class I-Tall category, maoy miguwang overall champion sa Physique Men, samtang si Malthus, nga milampos sa Figure Class II (Short), maoy gikoronahang hara  sa Figure Women.

Sa iyang bahin, si Bontuyan mihimo sab og impresyon sa labing unang world bodybulding contest sa Asya human iyang gidominar ang Physique Men. Siya sab maoy midaog sa Physique Men Class III (Short) human gipukan ang mga kababayan niyang sila si Skylove Panaligan sa Makati City, Leysander Buclaton sa Quezon City ug Lester Luczson sa Manila.

Wala sab magpaalkansi ang Sugbuanang si Teria nga maoy nanghawod sa Figure 40-above age group. Nahimong espesyal ang iyang kadaogan gumikan kay pulos man dekalibreng langyaw nga kontra ang iyang gipangpukan nga naglangkob nilang Donna Randell sa New Zealand, Clarissa Calingasan sa Canada, Audrey O’Keefe sa Scotland, ug Maria Dunlopsa New Zealand.

Lain pang mga Sugbuanon nga nagparamdam sa maong torneyo mao sila si Eugene Ybañez nga mitapos sa ikalimang puwesto sa Athletic Class II (Short) ug si Emma Satchell nga nalandig sa ikalimang puwesto sa mixed pairs uban ni Eddie Mugar sa Lanao del Norte. — (BANAT NEWS)