Abrenica Engineering hari sa Carcar Mayor’s Cup

CEBU, Philippines – Wala kapugngi sa pagpauwan og daghang puntos ang Abrenica Engineering didto sa fourth quarter diin wala’y bisan usa nga nakapiog sa pagmangtas sa threesome nilang Kim Calo, Mark Jayven Tallo ug ang beterano nga si Jercules Tangkay aron pagpukan sa surprise finalist Joemangs-Team Lito sa iskor, 116-94 aron sakmiton ang titulo sa Carcar Mayor's Cup Open basketball tournament kaniadtong Sabado sa gabii didto sa nagpunsisok nga Carcar coliseum.

Naanugonan ang Joemangs nilang team owners ug father-and-son tandem nilang Joey ug Lito Manguerra kinsa miabante sa finals human sa ilang dakong upset batok sa ASPA sa semifinals nga gipangulohan ni Alex Cainglet.

Ang Joemangs maoy kanaunay naglabaw gikan sa pagsugod ug hangtod nga sa kataposang 3:47 sa second period, 33-32, apan kalit lang silang namugnaw human sa lay-up ni Calo nga maoy naghatag sa Abrenica sa ilang unang labaw sa maong duwa 34-33. Mipataroy dayon si Tallo og back-to-back triples alang sa 40-33 naglabaw ug lain pa gyud nga duha ka baskets gikan ni Calo ug usa ka basket gikan ni Tangkay aron hatagan ang Abrenica og 46-37 nga labaw atol sa halftime.

Si Calo maoy nangu sa Abrenica ni coach Julius Caballero sa iyang 32 points apan ang 28 puntos ni Tallo maoy naghatag kaniya sa MVP award tungod sa iyang gipakitang lihok ilabi na sa iyang "dribbling exhibition" ug mga acrobatic lay-ups nga kanunay pakpakan sa mga basketball fans sa Carcar.

Ang star-studded nga Abrenica ni team owner Felix Abrenica nga magsaulog sa iyang adlaw'ng natawhan karong adlawa, maoy nagkontrolar sa duwa pagsugod sa third period ug nagpabuhagay og dugang puntos didto sa fourth quarter diin ang ilang 11 puntos nga labaw, 84-73, kalit lang miburot ngadto sa 22 puntos sa nahibiling 21 segundos nga mao ang final score nga 116-94.

Ang ex-pro nga si Danny Aying kinsa nakaduwa makadiyot sa Ginebra sa PBA human sa iyang pag-gradwar sa kolehiyo, maoy nangu sa Joemangs sa iyang 21 puntos ug midugang silang Melvin Dedace ug Wilkins Sanchez og 17 ug 15 puntos matag usa samtang ang kanhi USC Warriors center nga si  Enrico "Bogs" Llanto miamot og 14 puntos.

Si Manguerra kinsa miamot og kuatro puntos ngadto sa iyang team nagkanayon "okay lang kung pilde mi total wala man sab mi magdahom nga moduwa sa finals pero kumpiyansa man ang ASPA, aw amo silang nataghapan."

Dihang nagsugod na unta'g pangigo si Manguerra, wala na sad siya makawadat og bola didto sa uwahing bahin sa fourth quarter.

Sa sayo pa sa SK division finals, maoy milangkat sa korona ang Barangay Poblacion 1 human ilang gipilde ang Barangay Guadalupe, 101-93.

Puntos matag usa:

Abrenica Eng'g. (116)---   Calo 32, Tallo 28, Tangkay 24, Goloran 11, Isidro 5, Abad 5, Nailon 4, Dela Cerna 4, Dimco 2, Belande 1.

Joemangs (94)—Aying 21, Dedace 17, Sanchez 15, Llanto 14, Minoza 10, Ortuyo 4, Manguerra 4, Aninon 4, Kong 4. (BANAT NEWS)