Basketball sa isla sa Siargao andam na

CEBU, Philippines – Mga basketball officials didto sa isla sa Siargao nga gipangulohan sa kanhi Cebu  Institute of  Technology (CIT) juniors coach Romeo Cal, buot modapit kang Cebuano hotshot Dondon Hontiveros sa Alaska Aces ug sakop sa Gilas Pilipinas aron maoy mahimong pinasidunggang dinapit sa pagbukas sa 1st  Siargao Island Basketball League "BASKET TA SA SIARGAO" nga ipahigayon sa kataposang semana ning buwana.

Si Francisco" BINGO" Matugas kinsa usa ka congressional aspirant alang sa First District sa Surigao del Norte maoy nagpaluyo sa maong torneyo didto sa basketball-hungry nga isla didto sa Surigao del Norte.

Ang maong torneyo adto ipahigayon sa siyam ka lungsod sa Surigao del Norte nga naglangkub sa unang distrito sa Surigao del Norte.

Ang maong torneyo bahinon ngadto sa duha ka kategoriya nga mao ang 3 on 3 18- Under 18 ug 40 years old above diin ang opening pagahimoon sa  dinungan nga paagi sa duha ka benyu nga tambongan ni Hontiveros.

Si Cal nagpadala na'g imbitasyon ngadto kang Hontiveros ug nagkanayon nga mas mosamot kalipay ang mga fans sa Siargao kung madala ni Hontiveros si Calvin "The Beast" Abueva, nga usa sa labing maayong players sa bag-ong henerasyon sa mga basketball stars.

Matod pa ni Cal nga alang sa pagpangandam sa nahisgotang torneyo, adunay nagpadayon karon nga referee's clinic nga gidumala ni FIBA Commissioner Anthony Sulit ug SBP provincial commissioner Rey Canete ug mahuman kini karong adlawa didto sa lungsod sa El Carmen ug General Luna sa Surigao del Norte.

Ang maong torneyo gilusad aron pagtabang nga makakat-on ang mga batan-on sa Surigao del Norte ug ingon man alang sa camaraderie tali sa mga mahiligon sa basketball  didto sa maong dapit nga maoy natawhan nilang kanhi Gibebra star ug kanhi sab CAAA MVP nga si Marlon Piodo kinsa sakop karon sa coaching staff of the University of San Jose Recoletos Jaguars ug kanhi SWU Cobra Roman James Laygo. (BANAT NEWS)