Engbino, Sanchez nanghawod sa Speed 50 Ultramarathon
CEBU, Philippines – Ang tadhang Sugbuanong ultra racer nga si Desederio Engbino mibulhot og maayo gikan sa pagsugod sa lumba aron pag-average niini og kuwatro minutos ug 43 segundos matag kilometro dayon na ngadto sa pagdominar
sa labing unang Speed 50 Ultramarathon didto sa isla sa Mactan kagahapon.
Samtang wala sab magpaalkansi si Preciosa Sanchez nga maoy gikoronahang hara sa women's division.
Gawas nga maoy naghari sa 40-49 age group, ang 45-anyos nga si Engbino mirehistro sab labing paspas nga oras human mitikang sa finish line sud sa tulo ka oras, 55 minutos ug 41.26 segundos.
Si Jose Baguio sa Infinitea ug North Road Runner's Club nalandig sa ikaduhang dapit sa oras nga 4:20:00.53, samtang si Rey Berbesada mao mitapos sa ikatulo sa oras nga 4:54:08.04.
Naglangkob sa top 10 mao sila si Dalinsong (5:03:28.03), Ronald Entrolezo (5:05:03.52), Pedro Alcosero (5:28:01.97), Bernard Roy Tipan (5:31:19.20), Jan Ray Yadao (5:33:12.61), Eduardo Eduria ug Jerry Naya (5:53:23.08).
Sa women's category, si Sanchez sa NRR maoy milangkat sa kampiyonato. Siya sab ang nanghawod sa 40-48 age group sa oras nga 4:58:42.65.
Biya kaayo sa ikaduhang puwesto si Evangeline Balazuela sa oras nga 6:00:21.96, samtang sila si Rona Lacanlale (6:23:13.414) ug Hannah Huang (6:38:19.82) maoy mipahiluna sa ikatulo ug ikaupat nga dapit. Si Jennifer Zabala maoy mipatong sa ikalima sa oras nga 7:32:32.37. (BANAT NEWS)
- Latest
