Bulls misungag sa Cavs

CEBU, Philippines – Gisungag sa Chicago Bulls ubos sa liderato ni Derrick Rose ang Cleveland Cavaliers ni LeBron James aron pagsakmit og daog sa kulbahinam nilang duwa sa opening match sa 2015-2016 NBA season kagahapon didto sa United Center sa Chicago, Illinois.

Si Rose maoy nangu sa upat ka starters sa Bulls nga midaro og double figures pinaagi sa iyang 18 puntos. Si Pau Gasol lang ang starter sa Bulls nga wala makaiskor og double digits, apan nagamit lang gihapon siya sa depensa human makahimo’g unom ka blocks nga naglakip sa attempt ni James sa katapusang tres segundos.

May purohan pa unta nga makatabla ang Cleveland, apan gibulabog ni Jimmy Butler ang ‘inbound pass’   sa Cavs ngadto unta ni James.

Si Nicola Mirotic miamot og 19 puntos, si    Butler mitampo’g 17 puntos, samtang sila si Tony Snell ug E'Twaun Moore miabuno’g 11 puntos matag usa aron hatagan og init nga kadaugan ang ilang bag-ong coach nga si Fred Hoiberg, kinsa maoy mipuli sa gitaktak nga si Tim Thibodeau.

Gipangulohan ni James ang Cavs pinaagi sa iyang 25 puntos uban ang 10 ka rebounds, gisundan ni  Mo Williams nga adunay 19 puntos ug  Kevin Love sa iyang 18 puntos.

Didto sa Oracle Arena, mabulokon  ang unang duwa ni Final MVP Stephen Curry human siya mibahog og 40 puntos aron pangulohan ang defending champion Golden State Warriors nga milubong sa New Orleans Pelicans sa iskor, 111-95.

Si Curry maoy unang reigning MVP sa kasaysayan nga miiskor og labing menos 40 puntos atol sa opening sa liga.

Si Curry ug ang Warriors miisa sa championship banner ug nidawat sa ilang singsing atol sa usa ka pre-game ceremony.

Ang Warriors miposte og 10 puntos nga labaw sa halftime ug wala na mahulga hangtod nga nakuha nila ang ika-19 nilang sunod-sunod nga daog sa ilang korte sukad niadtong Enero 31 ug natabla sab ang franchise record nga nahimo sa miaging  season.

Sa laing duwa, ang Detroit Pistons mibuntog sa Atlanta Hawks sa iskor nga 105-94. (BANAT NEWS)