Cavs daku’g ‘Chance’

CEBU, Philippines - Kun ang mga general managers sa NBA ang pangutan-on, ang Cleveland Cavaliers nga gipangulohan ni NBA star LeBron James ang  ilang nakita nga moangkon sa kampiyonato sa sunod season sa liga nga buksan sa hinapos nga bahin ning  buwana.

 Ang Cavaliers diriyot mikampiyon sa miaging season, apan wala sila makalahutay sa kusog sa NBA Finals human sila gipukan sa Golden State Warriors, 4-2.

  Sa gihimong survey sa NBA.com, ang mga NBA general managers nagtuo nga bangis nga James ang moduwa sa 2015-2016 season diin baswaton niini ang Cavaliers ngadto sa labing una nilang NBA title.

 Makatabang sab og daku sa kampanya sa Cavaliers ang pagbalik og duwa nila ni Kevin Love, Anderson Varejao ug Kyrie Irving nga wala kaayo makatabang sa miaging finals tungod sa injury.

 Ang Cavaliers maoy nag-una sa botos sa mga NBA GMs.

Ang ikaduhang koponan nga gituohan mokampiyon mao ang mas milig-on nga San Antonio Spurs nga bidahan nila ni Tim Duncan, Tony Parker, Manu Ginobili, Kawhi Leonard ug bag-ong sakop nga si All-Star LaMarcus Aldridge.

Nagtuo ang mga NBA GMs nga lisud alang sa Warriors nga makahimo og ‘back-to-back’ championships tungod  sa paglig-on sa ubang powerhouse teams.

Si James mao usab ang nag-una sa botos sa NBA GMs nga mosakmit sa MVP award, nagsunod si   Anthony Davis sa New Orleans Pelicans. (BANAT NEWS)